Mơguah lơ 19/5, Ping gah tơring čar Kon Tum pơphun Jơnum klah čun 10 thun ngă tui tơlơi črâo trun mrô 05 mơng Ding jum kơđi čar tal XII “kơ bruă pơtrut hrăm, ngă tui tơlơi pơmĭm, gru hơdip, bruă mă mơng Khua mir sir Hồ Chí Minh”. Găn rơgao 10 thun pok pơhai, tơring čar hơmâo ngă tui boh tơhnal bruă mă djơ̆ hăng tơlơi sit nik, bruă jao amăng rĭm rơwang. Djop gưl, gơnong bruă hơmâo pơjing 2.760 hơbô̆ bruă klă, bruă mă ba glăi tŭ yua, ngă lar hyu djop anih amăng bruă hrăm hăng ngă tui gru hơdip mơng wa hô amăng pơphun mă bruă Ping gah hăng plơi pla mơnuih mơnam.

Amăng mông jơnum, Ping gah tơring čar Kon Tum pơpŭ bơni, jao hră pơpŭ mơng Khua git gai Ping gah tơring čar hăng hră pơpŭ mơng Khua Jơnum min mơnuih ƀôn sang tơring čar brơi 30 khul grup, 46 čô mơnuih ba gru. Anai lĕ hrơi mông kiăng đơ đam tơring čar tŏ tui pơsit tong tơlơi gơgrong, tơlơi yôm sit nik amăng bruă hrăm hăng ngă tui wa Hô amăng pơjing Ping gah hăng pơđĭ kyar ƀon lan.

Ăt amăng mơguah lơ 19/5 mơn, Grŭp apăn bruă Khul hlăk ai tơring čar Lâm Đồng pơphun Jơnum klah čun 10 thun ngă tui Tơlơi črâo ba mrô 05 mơ̆ng Ding jum kơđi čar tal 12, hrŏm hăng anun bơni hlăk ai mơbruă ngă tui tơlơi Wa thun 2025. Hơdôm thun rơgao, đơ đam tơring čar Lâm Đồng hmâo pok pơhai ba glăi bôh tơhnal lu ring bruă hlăk ai hơdôm gưl hăng abih bang nua rơbêh kơ 75 klai prăk; amăng anun hmâo 45 ring bruă gưl tơring čar, 446 ring bruă gưl tơring glông hăng rơbêh kơ 8.400 ring bruă, črăn bruă gưl să. Lâm Đồng dô̆ djă pioh 160 mơta hơdră grŭp, khul pơgang anih anom dô̆, ngă pơhưč rơbêh kơ 4.000 čô mơnuih amăng khul hlăk ai, tơdăm dra gum hrŏm. Amăng 10 thun, Khul hlăk ai hmâo bơni 380 grŭp, mơnuih mơbruă hăng pơmut brơi rơbêh kơ 5.800 čô mơnuih mơbruă mơ̆ng khul mut Ping gah Cộng sản Việt Nam.

Mơguah lơ 19/5, Jơnum min mơnuih ƀôn sang tơring čar Dak Nông pơphun mông ngă lơphet “Tết pla kyâo pioh hơdor na nao kơ wa Hô” hăng pok pơhai akŏ bruă pla glai thun 2025. Amăng mông ngă lơphet, khua mua tơring čar iâu pơthưr djop anom bruă, gong gai ƀon lan hăng mơnuih ƀôn sang ngă tui tơlơi pơtô mơng wa: “Yua kơ tơlơi dưi hơpluh thun pla kyâo, yua kơ tơlơi dưi ha rơtuh thun pla pơjing tơlơi hơdip ană mơnuih”. Tơdơi kơ mông ngă lơphet, ƀing khua mua hơmâo pla 1.300 phun kyâo hngo tlâo pok hla ƀơi anih pioh pla kyâo amăng akŏ bruă anih anom yua boh thâo măi mok Dak Nut, plơi prong Gia Nghĩa. Hrŏm hăng anun, hơdôm boh ƀon amăng đơ đam tơring čar ăt pơphun ha amăng plĕ mông ngă lơphet hăng pla kyâo. Thun anai, tơring čar Dak Nông ba tơbiă hơnong pơkă pơđĭ kyar rơbêh 1.700 ektar glai rưng.