Ƀơi phường Phú Yên, sa amăng hơdôm anih ia dăo dơlăm, tơdơi kơ ia đoh, anom bruă ngă hră pơ-ar hơmâo ječ ameč pơwot glăi mă bruă kiăng djru brơi mơnuih ƀôn sang. Rĭm hrơi, anom bruă hơmâo tŭ mă rơbêh 100 pok hră pơ-ar, lu hloh lĕ ngă brơi hră pơ-ar rĭm čô mơnuih, hră lŏn mơnai, hră akŏ sang. Yă Hồ Thị Bước, dŏ amăng plơi Lộc Đồng brơi thâo, tal hơjan rơgao ngă ia dăo tơl bơbung sang, djop kông ngăn hăng hră pơ-ar amăng sang anŏ lêng kơ ia kor hĭ. Kiăng hơmâo hră pơ-ar pơsit bơrơsua lŏn mơnai ƀơi sang phat kơđi, ñu kiăng nao pơ phường ngă glăi hră pơ-ar brơi kơ rơkơi hăng ană ñu.

“Kâo dŏ tơguăn ăt tañ mơn, huăi kaih ôh, ƀing gơmơi mă mrô, truh arăng iâu ta nao ngă. Ƀing apăn bruă djru brơi abih pran jua, črâo brơi ƀing gơmơi ngă hră pơ-ar, ƀing gơñu lêng kơ hur har mơ-ak”.

Kiăng plai ƀiă mông dŏ tơguăn hăng djru brơi mơnuih ƀôn sang glăk bưp tơnap tap tơdơi kơ hơjan ia dăo, gong gai ƀon lan hơmâo pơkiăo nao lu mơnuih apăn bruă djru ngă brơi hră pơ-ar. Rơngiao ƀing apăn bruă ƀơi anih anom, mơnuih ngă bruă dăng kông ăt hơmâo pơkiăo nao pơ anom mă bruă ha bah amăng.

Amai Huỳnh Thị Lệ Chi, mơnuih ngă bruă dăng kông phường Tuy Hòa, hơmâo pơkiăo nao djru pơ anom bruă ngă hră pơ-ar phường Phú Yên brơi thâo, bruă mă đing nao djru brơi mơnuih ƀôn sang pơgiong ngă hră pơ-ar amăng plang điện tử, sit biă ñu lĕ hăng ƀing tha rơma, ƀu thâo yua măi mok.

“Kâo djru brơi neh met wa čih pơmut hră pơ-ar, hơdôm pok hră pơ-ar lu hloh lĕ pơsit tong hră pơ-ar, čih pơmut hră pơ-ar bơdjơ̆ nao lŏn mơnai. Ƀing gơmơi črâo ba, ngă brơi hăng djru brơi mơnuih ƀôn sang hlao.”

Tui ơi Nguyễn Xuân Cảnh, Khua Jơnum min mơnuih ƀôn sang phường Phú Yên, tơdơi kơ ia dăo, mơnuih nao ngă hră pơ-ar lu tui, lu mơnuih rơngiă hĭ abih hră pơ-ar phun. Ƀơi anăp kơ tơlơi anai, ƀon lan hơmâo pok glăi hơdôm grup djru brơi amăng plơi pla, pơkiăo nao ƀing apăn bruă tơl plơi pla kiăng črâo brơi, djru brơi mơnuih ƀôn sang čih glăi, pơhrua hră pơ-ar.

“Anom bruă ngă hră pơ-ar lêng kơ pioh mơng 1-2 čô mơnuih apăn bruă črâo brơi ngă. Đa hrơi ăt iâu ƀing hlăk ai, ƀing ngă bruă dăng kông tui hluai bruă phara, tơdah kiăng amra hơmâo mơnuih djru brơi.”

Ƀu djơ̆ kơnong ƀơi phường Phú Yên, djop să gah Ngŏ tơring čar Dak Lak lêng kơ bơdjơ̆ nao yua ia dăo. Amăng anun, tlâo boh anom bruă ngă hră pơ-ar ƀơi Hòa Xuân, Đông Hòa hăng Tuy An Tây ia dăo dơlăm, ngă răm rai sa, dua gơnam măi mok hăng bơdjơ̆ nao anih anom. Hơdôm anom bruă anai kiăng rơngiă giăm ha wŏt hrơi tơjuh kiăng hơkrŭ glăi hăng pơwot glăi mă bruă tui hơđăp.

Ƀơi să Tuy An Đông, anom bruă ngă hră pơ-ar ăt ia dăo, lu gơnam măi mok răm rai. Samơ̆, gong gai ƀon lan hơmâo ječ ameč pơkra ming, dưm dăp mơnuih mă bruă kiăng huăi ngă gun bruă ngă hră pơ-ar brơi mơnuih ƀôn sang. Ơi Trần Văn Biên, Khua Jơnum min mơnuih ƀôn sang să Tuy An Đông brơi thâo:

“Truh ră anai anom bruă hơmâo pơwot glăi mă bruă, glăk djru mơnuih ƀôn sang pơhrua kah hăng ngă glăi hơdôm hră pơ-ar kiăng hloh amăng sang anŏ. Ră anai mrô mơnuih apăn bruă lêng pơhlôm djop, ƀuh tơlơi rơkâo mơng neh met wa lu đơi amra pơkiăo nao ƀing hlăk ai hăng sa, dua mơnuih ngă bruă pơkŏn nao djru kiăng lăp djơ̆ tơlơi rơkâo mơng neh met wa.”

Ha blan tơdơi kơ ia ling dăo, hơdôm tơlơi luk puk mơng hră pơ-ar kơ neh met wa kual ia ling dăo gah Ngŏ tơring čar Dak Lak hơmâo pơsir hĭ khut khăt. Bruă gơgrong pơkiăo nao mơnuih apăn bruă hăng pơkra ming gơnam măi mok hmao tlôn djru brơi hơdôm boh ƀon lan anun lĕ Tuy An Đông hăng Phú Yên huăi ƀuh ngă kaih hră pơ-ar. Hơdôm pok hră pơ-ar hơmâo ngă brơi jing hră pơ-ar djơ̆ tơlơi phiăn kiăng mơnuih ƀôn sang hơđong tơlơi bơwih ƀong hăng pơsir hĭ hơdôm bruă dŏ đôm glăi tơdơi kơ hơjan ia ling dăo./.