Rơbêh 8 mông mơguah lơ 1/7 ƀơi anom bruă ngă hră pơ-ar să giăm guai Bờ Y, tơring čar Quảng Ngãi hơmâo laih 16 čô mơnuih ƀôn sang nao ngă hră pơ-ar, lu hloh lĕ ngă hră pơ-ar lŏn mơnai. Ơi Nguyễn Thanh Hùng, mơnuih arăng jao git gai anom bruă ngă hră pơ-ar brơi thâo, să giăm guai Bờ Y hơmâo jơlan guai hăng 2 boh dêh čar Lao hăng Kur. Să hơmâo akŏ pơjing hluai tui anih anom mă bruă hơdôm boh să: Pờ Y, Đăk Xú hăng tơring kual Plei Kần. Tơdơi kơ dưm dăp, să prong rơbêh 240 km karê, mrô mơnuih rơbêh 35.000 čô. Anih pơdong anom mă bruă ƀơi anom mă bruă phun tơring kual Plei Kần, tơring glông Ngọc Hồi, tơring čar Kon Tum (hơđăp). Ơi Nguyễn Thanh Hùng brơi thâo:

“Anom bruă ngă hră pơ-ar hơmâo Ping gah să jao brơi 9 čô mơnuih apăn bruă dŏ djru bruă. Ƀing gơñu lĕ ƀing apăn bruă mơng să Pờ Y, Đăk Xú hăng tơring kual Plei Kần hơđăp glăi mă bruă ƀơi anom bruă ngă hră pơ-ar să. Ƀing gơmơi hơmâo jao bruă jang jai amăng hơdôm bruă ayuh hyiăng lŏn mơnai, ngă hmua, man pơdong hăng sĭ mơdrô, gru grua mơnuih mơnam hăng ngă hră pơ-ar akŏ sang. Ƀing apăn bruă anai lăp djơ̆ kiăng kơ djru brơi mơnuih ƀôn sang”.

Sit biă ñu brơi ƀuh amăng hơdôm hrơi tŭ mă, ngă brơi hră pơ-ar kơ mơnuih ƀôn sang, ƀing apăn bruă ƀơi anom bruă ngă hră pơ-ar să Bờ Y pioh lu mông kiăng črâo ba, djru brơi mơnuih ƀôn sang čih tơlơi pơhing pô yua hơdôm tơlơi pơplih kơ anih anom. Lu mơnuih aka ƀu thâo tong ten ƀing gơñu glăk dŏ ƀơi să hơpă amăng tơring čar Quảng Ngãi. Ơi Hoàng Hữu Sửu nao ngă hră pơ-ar jao lŏn mơnai brơi 2 čô ană, ñu pơsit tong, blung a ñu dŏ sư̆ rơbư̆. Samơ̆ ñu dưi ngă tañ ngă pơ-ar tơdơi kơ hơmâo arăng črâo ba hăng pran jua ngă bruă tañ mơng ƀing apăn bruă:

“Blung a hlơi hlơi lêng kơ sư̆ rơbư̆ yua mơng mơng tơring čar Kon Tum hơđăp, ră anai lĕ tơring čar Quảng Ngãi. Laih dong mơng 3 gưl trun dŏ 2 gưl. Mơguah, ngă hră pơ-ar ƀuh ăt amuñ mơn. Bing apăn bruă djru brơi hur har mơ-ak, čơkă hăng črâo ba tong ten”.

Kiăng gêh gal brơi mơnuih ƀôn sang, hrŏm hăng tơlơi pơhing kơ anih mă bruă amăng să phrâo hluai tui pơtô pơblang, lăi pơthâo tơl mơnuih ƀôn sang hăng amăng plang mơnuih mơnam, mơng hrơi mă bruă blung a, Jơnum min mơnuih ƀôn sang să lêng kơ pơpha mơnuih čơkă, črâo ba mơnuih ƀôn sang nao djru brơi bruă mă ƀơi anih mă bruă phrâo.

Tơdơi kơ pơmut hrŏm tơring čar Kon Tum, tơring čar Quảng Ngãi hơmâo 9 boh să giăm guai amăng tơring čar Quảng Ngãi, hơmâo Bờ Y, Sa Loong, Dục Nông, Đăk Plô, Đăk Long, Rờ Kơi, Mô Rai hăng Ia Đal./.