VOV4.Jarai - Čơtlăm lơ 13/10, Khul anom bơwih ƀong tơring čar Daklak gum hrom hăng Khul hlăk ai bơwih ƀong tơring čar Daklak pơphun jơlan hơdră Pơbưp ƀô̆ mơta čơkă mơ-ak Hrơi pioh kơ mơnuih bơwih ƀong Việt Nam lơ 13/10. Amăng mông bưp, Khua Khul bơwih ƀong tơring čar lăi pơthâo glăi tơlơi bơwih ƀong amăng 9 blan thun 2022.

Khua tơring čar Daklak ƀơk bơnga hơ-ư̆č hmưi hơdôm anom bơwih ƀong

Pơhmư̆ mông ngă Lơphet kĭ pơkôl gum hrom abih bang kơplah wah Khul bơwih ƀong tơring čar Daklak hăng Khul hlăk ai bơwih ƀong tơring čar Daklak. Daklak ră anai hmâo giăm truh 11.800 bôh anom bơwih ƀong, dăp 22 amăng đơ đam dêh čar hăng dŏng tal 2 amăng kual Dăp Kơdư. Hăng tơlơi pơđĭ kyar tañ gah mrô, mơnuih bơwih ƀong, anom bơwih ƀong hmâo laih lu tơlơi gum hơgôp kơ tơlơi pơđĭ kyar bơwih ƀong mơnuih mơnam mơng tơring čar. Tui hăng ơi Huỳnh Văn Dũng, Khua Khul bơwih ƀong tơring čar Daklak, mơng akô̆ thun truh ră anai Daklak hmâo pơdŏng phrâo rơbêh kơ 1000 bôh anom bơwih ƀong, đĭ giăm truh 26% bơhmu hăng thun hlâo. Tơlơi pơđiĭ kyar anai amra hmâo dong pran kơtang kơ khul bơwih ƀong sĭ mơdrô Daklak djru hơđong hăng pơđĭ kyar bơwih ƀong mơng tơring čar.

Ƀrô hơdor glăi hrơi Mơnuih ngă bruă sĭ mơdrô Việt Nam, tlam lơ 13/10, ƀơi plơi prong Kon Tum, Jơnum min mơnuih ƀôn sang tơring čar Kon Tum jơnum bưp mơnuih ngă bruă sĭ mơdrô tal 2. Hơdră ngă anai tŭ yua biă pioh kơ tơring čar Kon Tum pơsir hmao kru tơlơi tơnap tap, gun gan mơ̆ng ƀing ngă bruă sĭ mơdrô sit nao ĕp lăng, tơña hơduah, tuh pơ alin hăng djru ngă pơblih bruă tuh pơ alin ƀơi tơring čar. Pơhiăp ƀơi mông jơnum, ơi Nguyễn Hữu Tháp, Kơ-iăng Khua Jơnum min mơnuih ƀôn sang tơring čar Kon Tum bơni kơ ƀing ngă bruă sĭ mơdrô, lu sang bruă mơdrô hlăk gir run găn rơgao tơlơi tơnap tap, hơmâo tơlơi djru hrom yôm rŭ glăi, pơtrut pơđĭ kyar tơdơi kơ klin Covid 19.

Hăng pran jua mă bruă mơak klă, tơpă hiam ƀơi mông jơnum hăng ƀing ngă bruă sĭ mơdrô tal2, khua mua pơ ala gah anom bruă sĭ mơdrô hơmâo rơkâo đĭ hăng khua mua tơring čar Kon Tum lu tơlơi hlăk bưp lơ̆m kiăng hơduah ĕp tuh pơ alin mă bruă sĭ mơdrô ƀơi tơring čar.

Mông jơnum hrom abih bang

VOV.TN čih

Siu H’ Prăk-Nay Jek:  Pơblang