Jing mơnuih pơ ala brơi hlăk ai mơ̆ng tơring čar Dak Lak, kơnong hơjăn đôč dưi nao jơnum tŭ mă tơlơi apah bơni kơ čơđai sang hră, čơđai gưl prong, hlăk ai mơnuih djuai ƀiă, hur har, ba gru hlâo tal 10, thun 2023, adơi Đoàn Gia Hân, djuai ania Tày, hrăm anih 12, Sang hră pơtô sa hnong Nguyễn Du, ñu hơmâo boh tŭ yua amăng bruă hrăm hră lăp bơni biă mă. Ñu hơmâo mă lu pri apah bơni kah hăng: pri mrô sa gưl tơring čar hăng pri mrô dua gưl dêh čar tal pơplông Olympic tơlơi pơhiăp Angle pioh kơ čơđai sang hră hăng čơđai gưl prong thun 2022; jing čơđai sang hră 3 bruă hiam gưl dêh čar; mut hrŏm ding kơna čơđai sang hră hrăm thâo tơlơi hrăm Sinh học. Ƀu kơnong hrăm thâo đôč ôh, Gia Hân dŏ mut hrăm lu mơta, ngă hrŏm lu bruă mă gah rơngiao mông hrăm hră, bruă mă djru mơnuih mơnam ăt kah hăng bruă mă amăng grup tơdăm dra mut phung, grup čơđai sang hră mut phung...Ñu lĕ ding kơna apăn bruă phun grup tơdăm dra mut phung sang hră, ding kơna Khul grup hrăm tơlơi Angle gưl tơring čar. Đoàn Gia Hân lăi: Amra gir run dăp hrơi mông gêh găl hăng djơ̆ hnong pioh ngă hrŏm djop bruă mă, tơlơi jak iâu ngă hrŏm tơpuôl, grup. Laih dơ̆ng, ƀu pơdơi ôh gir run hrăm kiăng thâo, pơbuă tui tơlơi thâo kơ ta pô.

“Kâo ăt gir run kiăng pơđĭ tui tơlơi thâo kơ ta laih anun pơsir mă tơlơi tơnap tap kiăng dưi hrăm thâo, hơmâo boh tơhnal klă anăp nao dĭ da gla kơñ. Kơñ pơgi anai hăng tơlơi hrăm sinh học jing hrăm gah mơnong hơdip lĕ kiăng hrăm thâo bruă kơsem min, hơduah ĕp lăng boh thâo ia rơgơi gah mơnong hơdip ăt kah hăng hơdră kơsem min ia rơgơi pioh sem lăng ngă tui boh thâo phrâo hloh mă bruă, djru pơjrao duăm ruă kơ mơnuih mơnam”.

Hăng Y Un Diễm, ră anai  hlăk dŏ hrăm thun tal 3 sang hră hrăm bruă nai pơtô tơlơi Angle ƀudah juăt lăi tơlơi Mi, sang hră gưl prong Đại học Tây Nguyên, anŏ kiăng anăp nao mơ̆ng ñu lĕ khom găn rơgao tơlơi tơnap tap, lông lăng. Kiăng pơwơ̆t glăi pơ sang hră tơdơi kơ 3 thun tơ̆i đưn hĭ, sa čô dra djuai ania Triêng hlăk gir run hrăm hăng ngă hrŏm grup hyu mă bruă, jing “Čơđai gưl prong 5 mơta bruă klă”gưl tơring čar laih anun Khua khul pơtô ba khul grup čơđai gưl prong dưi pơ anăn "Grup čơđai gưl prong 5 mơta bruă klă" gưl dêh čar. Ñu hơmâo ngă lu bruă glăm ba kah hăng Khua khul čơđai sang hră 5 mơta bruă klă ƀơi sang hră, ding kơna Khul čih pioh grup čơđai gưl prong Việt Nam tơring čar Dak Lak. Nao hrăm hră rah, hyu mă bruă apah pơtô rah pơ sang anŏ arăng ngă nai pơtô djru ba, Diễm hơmâo lu tơlơi thâo thăi kơ ñu, găn rơgao lu bruă ngă laih anun hơmâo pơhrui glăi ƀiă prăk kăk bơwih brơi tơlơi hơdip mơda rim hrơi kơ ñu pô. Ñu ăt pơmin ngă tui sa kơčăo bruă laih anun kiăng pok pơhai ngă tui amăng plơi pla ñu kơñ pơgi anai. Y Un Diễm lăi:

"Kâo hơmâo kơčăo bruă kiăng ngă anun lĕ glăi pơtô tơlơi Angle ƀơi plơi pla. Hăng ƀing gơyut mơnuih djuai ƀiă kah hăng kâo anai tơnap tap biă mă hăng gleh biă mă dưi hrăm tơlơi Angle. Anun yơh laih hrăm giong, tơbiă mơ̆ng sang hră kâo kiăng glăi pơ plơi pla ta pô, glăi djru ƀing gơyut amăng plơi pla hơmâo tơlơi gêh găl hrăm tơlơi Angle, dưi nao truh pơ kual lŏn phrâo hăng ba tơlơi kơtang amăng pran jua truh pơ ƀing gơyut gơyâo, kiăng gơñu dưi kjăp pran jua, tơlơi pơmin gir run amăng tơlơi hrăm hră kah hăng kâo anai”.

Dak Lak ră anai hơmâo 170 rơbâo čô čơđai sang hră, čơđai gưl prong mơnuih djuai ƀiă hlăk dŏ hrăm ƀơi djop gưl sang hră, sang hră hrăm bruă ngă nai pơtô hăng hrăm gưl prong. Ngă hrŏm hăng ƀing čơđai sang hră gưl prong thun blan rơgao, tơring čar Dak Lak hơmâo lu hră čih anăn, djru ba hrăm hră, pơtrut pơsur pran jua ƀing čơđai sang hră, čơđai sang hră gưl prong hrưn đĭ, ngă gêh găl hăng pơtrut ƀing adơi đeh ană amôn hơđong pran jua hrăm hră. Adơi H’Phương Hoa Êban, čơđai sang hră hrăm ngă nai pơtô tơlơi Angle, sang hră gưl prong Đại học Tây Nguyên brơi thâo:

“Lơ̆m hrăm hră hăng pơhrăm drơi jăn pô, kâo ăt thâo hluh rơđah hơdôm tơlơi djru mơ̆ng ping gah hăng kơnuk kơna lu biă mă anun yơh kâo khom gir run hrăm hră ăt kah hăng pơhrăm glăi drơi jăn pô. Hrŏm hăng anun, yua hơmâo tơlơi kiăng prong biă mă hrăm hră pioh djru glăi mă bruă kơ mơnuih mơnam lăi hrŏm, plơi pla mơnuih djuai ƀiă ta pô hnun mơ̆n, kâo kiăng hrăm thâo, pơđĭ tui na nao tơlơi thâo thăi, tơlơi pơmin lu bruă mă kiăng pơyơr pran jua kơ mơnuih ƀôn sang plơi pla ta pô”.

Hrŏm hăng jơlan hơdră mơ̆ng Ping gah hăng kơnuk kơna, tơlơi gơgrong jing pô pơala hăng pơgang ba anŏ tŭ yua kơ ƀing čơđai gưl prong, Khul čơđai sang hră gưl prong Việt Nam tơring čar Dak Lak, ñu dŏ đing nao pok pơhai Hơdră bruă pơđĭ tui tơlơi thâo pơhiăp Angle hăng hơdră dưi mut phung hăng jar kmar brơi kơ ƀing tơdăm dra čơđai gưl prong; akŏ pơjing kơčăo bruă ngă hrŏm, djru ba hăng pơđĭ kyar bruă čơđai gưl prong mơnuih djuai ƀiă. Amai H’Giang Niê, Khua anom bruă hlăk ai mut phung tơring čar Dak Lak, Khua Khul čơđai gưl prong Việt Nam tơring čar Dak Lak brơi thâo: hơdôm čơđai gưl prong djuai ƀiă ba gru hlâo amra jing sa gru bơngač bang hyu tơlơi kiăng, čang rơmang pơyơr pran jua, hrưn đĭ mơ̆ng hlăk ai hăng čơđai muai, boh nik ñu ƀing gơyut amăng kual plơi pla.

“Ƀing gơmơi čang rơmang lĕ ƀing hlăk ai čơđai sang hră gưl prong amra pơdah thâo tơlơi glăm ba, bruă mă hrŏm amăng khul, grup, pơđĭ tui tơlơi ngă bruă jing aliăng kơ čơđai sang hră, čơđai gưl prong, hlăk ai mơnuih djuai ƀiă amăng bruă djă pioh, pơđĭ tui gru grua hiam djuai ania, ngă hrŏm ba yua pơblih mrô. Gơmơi čang rơmang grup anai amra mă bruă tŭ yua hăng hrŏm hăng anom bruă Khul čơđai gưl prong ngă djơ̆ hơdôm tơhnal pơtrun”.

Hăng jơlan hơdră ngă hrŏm, djru ba, lu čơđai sang hră, čơđai gưl prong mơnuih djuai ƀiă ƀơi Dak Lak gir run khin hơtai, kjăp pran jua hloh amăng bruă mă, gum hrŏm amăng khul. Ƀing adơi đeh ană amôn hur har hrăm hră, hrăm lu, pơđĭ tui tơlơi thâo prăp lui atur či ngă bruă tơdơi adih, kiăng pơyơr pran jua amăng bruă mă, tơlơi pơmin, ia rơgơi djru ană plơi pla.