Khul pel ĕp bruă mă, krăp lăng mrô 25 mơ̆ng Ding jum kơđi čar, Khul git gai Ping gah yua Ding kơna Ding jum kơđi čar, Ding kơna git gai Ping gah, Khua Jơnum min Pel ĕp bruă mă mơ̆ng Ping gah ơi Trần Sỹ Thanh ngă Khua grup, phrâo ngă bruă hăng Khul khua gum bruă ping gah tơring čar Khánh Hòa kơ bruă pok pơhai djŏp tơlơi pơtrun, tơlơi pơčrâo bruă mơ̆ng Ping gah. Tơlơi pel ĕp bruă mă pơƀut kơ bruă kơsem min boh thâo ia rơgơi, hrăm hră, git gai črâo bruă hăng pok pơhai Tơlơi pơtrun Jơnum ping gah dêh čar tal 14; čih pơkra jơlan hơdră ngă bruă mơ̆ng tơring čar; laih dong lăng glăi bruă prăp rơmet ruah khua pơ ala mơnuih ƀôn sang dêh čar tal 16 hăng khul khua pơ ala mơnuih ƀôn sang djŏp gưl rơwang thun 2026-2031. Đĭ pơhiăp ƀơi mông jơnum, ơi Trần Sỹ Thanh lăi, bruă pok pơhai Tơlơi pơtrun Jơnum ping gah tơring čar Khánh Hòa kiăng nao hrŏm krĕp hăng Tơlơi pơtrun Ping gah dêh čar tal 14, pơhlom djơ̆ hrŏm mơ̆ng tơlơi pơtrun truh kơ bruă mă. Tơring čar kiăng prăp rơmet hlâo, pơčeh phrâo lơ̆m ngă bruă, akŏ pơjing hơbô̆ bruă, hơdră ngă bruă tŭ yua kiăng Ping gah dêh čar pơƀut glăi, ngă tui ƀơi lu anih.

Grup hyu mă bruă sem lăng bruă mă mrô 21 mơ̆ng Ding jum kơđi čar, Khul apăn bruă git gai ping gah dêh čar, yua kơ ding kơna Ding jum kơđi čar, Khua ding jum pơtom hiăp  ơi Lê Hoài Trung ngă khua khul, phrâo lăi pơthâo hră pơtrun ĕp lăng bruă mă thun 2026 hăng Khul khua mua apăn bruă phun ping gah tơring čar Gia Lai. Boh yom phun nao ĕp lăng bruă pok pơhai ngă tui hơdôm pok hră pơtrun, pơčrâo ba mơ̆ng Gơnong dlông, biă mă ñu ngă tui Hră pơtrun ping gah dêh čar tal XIV laih anun bruă prăp lui ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang djop gưl guang bruă thun 2026-2031. Pơhiăp ƀơi mông jơnum, Khua ding jum  pơtom hiăp ơi Lê Hoài Trung lăi pơtong, bruă nao ĕp lăng tong ten, khut khăt, krăp lăng djơ̆ hơdôm jơlan hơdră tơlơi pơtrun mơ̆ng Gơnong dlông, ngă tui djơ̆, sa amăng plĕ hăng djơ̆ tơlơi pơčrâo. Lơ̆m lu anom bruă ping gah, pơtum ngă tui bruă mă pơđĭ kyar tơlơi bơwih ƀong huă mơnuih mơnam, prăp lui brua ruah khua, jing hơdôm bruă anai kah hăng tơlơi pơhing bruă ngă rim hrơi, ječ ameč khom ngă.