Nao jơnum hrŏm hơmâo 40 boh sang bruă mơdrô hăng 40 boh čơgăn pơdă anih jak iâu mă bruă kah hăng mơnuih mă bruă amăng ƀirô, ƀing ngă bruă jŭ yap prăk kăk, ƀing pơjing jơlan hơdră ba yua ia rơgơi AI, ngă bruă wai lăng tơdrun kompan ia rơsĭ, ƀing kơhnăk gah bruă mơgăt ƀattô, kơhnăk pơkra ming rơdêh ôtô….pioh brơi kơ 4000 čô čơđai sang hră gưl prong rai mơ̆ng lu sang hră gưl prong, sang hră hrăm bruă gưl ƀrô amăng kual.

Hrŏm hăng bruă jak iâu mơnuih mut mă bruă, ƀing čơđai sang hră gưl prong dŏ mut jơnum hrŏm bơkơtuai “Hrơi mơak sem bruă Valoma thun 2026” hăng akŏ ñu “Pơđĭ tui mơnuih mă bruă-Akŏ pơjing bruă mă kơñ pơgi”. Pơ anai, lu mơnuih rơgơi kơhnâo kah pơpha boh yom phun kơ hơdră či pơsir bruă mă, tơlơi thâo mơneč mă bruă, hơdră tơña hăng lăi glăi, anăp nao kơ bruă mă kiăng djru ƀing tơdăm dra čơđai sang hră gưl prong pơđĭ tui tơlơi thâo pơhno nao rai amăng bruă mă ƀơi anih apah mơnuih mă bruă.