Plơi Trà Cong, să An Hòa, tơring glông An Lão hơđăp, dŏ kơđŏm ƀơi tơkai čư̆ Gai, ƀơi kơčong čư̆ hăng ter tơkai čư̆, lu tơlô̆ pơtâo pơprong pơrơkă pơrơkưng, hŭi biă mă, tơdah lŏn tơhlŏm kriăng yua hơjan sui hrơi lŏn tơluč amuñ mơtam tơhlŏm kriăng dlưh trun pơtâo tung glung rai. Yă Nguyễn Thị Hoa, mơnuih ƀôn sang plơi Trà Cong brơi thâo, ñu hăng lu mơnuih ƀôn sang ƀuh lu wơ̆t laih lŏn dlưh čư̆ tơhlŏm, tơlô̆ pơtâo pơprong tung glung trun mơ̆ng čư̆, ngă kơ lu črăn jơlan kơđông gun hĭ, răm ƀăm, ƀu thâo truh nao rai.

“Tơdah sa boh pơtâo mơ̆ng čư̆ tung glung trun amra hơdui ba hrŏm lu tơlô̆ pơtâo pơkŏn tơhroh trun. Lơ̆m anun, ană plơi pla dŏ pơ kual gah yŭ giăm tơkai čư̆ jơlan pơpă či đuăi nao. Čư̆ dlông, boh pơtâo tung glung hmar, lê̆ trun truh pơ jơlan prong, ƀu lăi ôh amăng plơi pla”.

Yă Phạm Thị Lệ Thùy, Kơ-iăng khua Jơnum min mơnuih ƀôn sang să An Hòa brơi thâo, Trà Cong lĕ sa amăng năm boh plơi hŭi biă mă hơmâo tơlơi truh lŏn tơhlŏm, hơmâo anih đa hŭi hyưt kơtang hloh. Să gơñu prăp lui laih mơ̆n hơdră či pơđuăi mơnuih ƀôn sang amăng mông ječ ameč truh laih anun hơmâo hnăl hlă pơtă hlâo anih či hơmâo lŏn tơhlŏm bơyan hlim, brơi abih bang khom kơđiăng:

 “Tơdah amăng mông hơmâo tơlơi truh, tui hluai ječ ameč lăi pơthâo hlâo lŏn adai truh, să amra ngă tui rim črăn bruă hơmâo pơsit laih, kiăng pơhlom hlâo ƀing hlơi arăng brơi khom đuăi mơ̆ng sang, nao dŏ pơ anih rơnuk rơnua. Anih či nao dŏ lĕ amăng sang hră, sang bruă kơnuk kơna, gong gai plơi pla Xuân Phong Nam, plơi Vạn Long, plơi Vạn Khánh”.

Hrŏm hăng tơlơi hŭi lŏn tơhlŏm, hơdôm să plơi pla kual čư̆ siăng gah Ngŏ tơring čar Gia Lai dŏ hơmâo tơlơi hŭi ia tơluh truh kor rai mơ̆ng čư̆ sit hơjan hlim prong. Kah hăng ƀơi kual ia ania Nước Ói, plơi thôn 1, să An Toàn. Bơyan hơjan hlim, ia ania đĭ blai hang, ling dăo, rô kơtang, lu wơ̆t tom hơmâo tơlơi truh djai mơnuih hăng răm ƀăm kông ngăn. Kiăng plai ƀiă tơlơi răm ƀăm truh bơyan hơjan, ƀơi anăp kơ bơyan hlim kơthel ngă, gong gai kơnuk kơna hơmâo hlă pơnăng lăi pơthâo, pơpha tơhan nao mă bruă, pơčrâo brơi mơnuih ƀôn sang bĕ hĭ anih či hơmâo tơlơi truh, sit hơjan ia ling dăo, pơgăn ƀu brơi mơnuih rô nao rai lơ̆m ia đĭ kơtang. Ayong Đinh Văn Bằng-Khua plơi thôn 1, să An Toàn brơi thâo:

“Să hơmâo grup tơhan plơi dŏ mă bruă, ămng plơi lĕ hơmâo grup tơhan pơgang plơi pla rơnuk rơnua hăng hơdôm čô hlăk ai tơdăm dra mut phung, sit bơyan hơjan hlim nao dŏ gak ƀơi anih ia dăo pơgăn ƀu brơi mơnuih ƀôn sang nao rai amăng mông hŭi rơhyưt. Pơtô lăi mơnuih ƀôn sang ngă djơ̆ tơlơi phiăn pơhlom hlâo tơlơi truh lŏn adai ngă”.

Ơi Nguyễn Văn Vân -Kơ-iăng khua jơnum min mơnuih ƀôn sang să An Toàn brơi thâo, yua hơmâo na nao tơlơi truh lŏn adai ngă, să ăt prăp lui na nao bruă mă,  brơi tơhan plơi hăng gơnam mă bruă djru pơhlôm hlâo, pơklaih mơnuih mông ječ ameč. Hrŏm hăng anun, djop gưl anom bruă ping gah, gong gai kơnuk kơna să An Toàn, ăt dăp hơdră či pơdŭ đuăi mơnuih ƀôn sang sit hơmâo tơlơi ječ ameč truh hŭi rơhyưt.

“Să hơmâo dăp hơdră, prăp lui mă bruă, lŏm hơmâo kơthel thâo, ƀing tơhan djop sang bruă nao djru pơgang. Tơdah lŏn tơhlom, nao djru klơi, lŏn kuăi huet pok jơlan brơi mơnuih ƀôn sang dưi nao rai. Tơdah boh pơtâo pơprong lĕ khom iâu rơdêh čuk, kuai mă lŏn, khom apah arăng mă bruă, apah rơdêh čuk kiăng ană plơi pla, hăng rơdêh dưi nao rai ƀơi jơlan kơđông”.

Ƀuh rơđah, ƀơi Gia Lai bruă pơhlom pơgang lŏn adai truh hơjan hlim rơbŭ kơthel hơmâo pok pơhai tui hluai phara ba anŏ gêh găl amăng kual. Kual ter hang ia krông Apa, ia Ayun ƀudah jum dar dơnao bơnư̆ Ayun Hạ đing nao kơ bruă pơđuăi mơnuih ƀôn sang dŏ gah tơkai ia, anih ia lip, ngă kơjăp king hmua, hnoh ia rô. Kual giăm hang ia rơsĭ, ia krông pơprong, hơmâo hơdră lăi pơthâo tañ, kiăng rô nao rai amăng jơlan ia hăng jơlan ia krông rơnuk rơnua, pơtă pơtăn kơ ƀing ngă bruă rông akan hơdang pơgang anih mă bruă rông akan hơdang. Lơ̆m anun, djop să ƀơi kual čư̆ siăng kah hăng An Hòa, An Toàn đing nao ƀơi hơdôm anih lŏn tơhlŏm hăng prăp lui hơdră pơdŭ đuăi mơnuih ƀôn sang amăng mông ječ ameč. Bong glăi hăng tơlơi răm ƀăm bơyan kơthel ƀơi Gia Lai yua kơ anun ƀu kơnong dưi bong glăi hăng ayuh hyiăng hlim hơjan đôč ôh, dŏ wai lăng tong ten tơlơi či hơmâo sit bơyan hơjan hlim truh amăng djop tơring phara ba anŏ gêh găl, pok pơhai ngă tui tui tơlơi gêh găl amăng kual mơ̆n.