Amai Đỗ Thị Mỹ Duyên, 24 thun, dŏ ƀơi phường Ƀuôn Ma Thuôt, tơring čar Dak Lak brơi thâo, tơlơi pơhing mơnuih mơnam facebook ră anai jing anih pơtruh nao rai, jĕ giăm, mơak pran jua, laih anun anih ĕp lăng tơlơi pơhing tañ truh rim hrơi. Biă mă ñu amăng mông hơmâo tơlơi truh lŏn adai ngă, rơbŭ kơthel, ia ling dăo, bruă pơklaih mơnuih amăng mông ječ ameč lĕ hơmâo plang facebook lăi pơthâo tañ, hmar biă mă. Samơ̆ anŏ dŏ kơƀah lĕ, tơlơi pơhing pơthâo amăng facebook anŏ sô hăng phrâo dŏ lŭk pŭk, tơdah ĕp ƀu ten, ƀơi anŏ tơlơi pơhing hyu pơčeh mă ƀu tơpă ôh ăt hơmâo mơ̆n. Hlăk tal rơbŭ kơthel, ia lip kơtang ƀơi kual Dap Kơdư-Dơnung tong krah, Đỗ Thị Mỹ Duyên, ba yua lu anăn tơlơi pơhing facebook hăng ƀuh lu mơnuih mut ĕp lăng jing ƀing fanpage gah tơhan kông an yơh pôr tơlơi pơhing hmar hăng djơ̆ ten hloh, lăp đăo kơnang. Mơ̆ng anun, Đỗ Thị Mỹ Duyên juăt muy ĕp tơlơi pơhing amăng plang anai:

“Kâo juăt ĕp facebook, amăng anun juăt ĕp plang tơlơi pơhing kông an Dak Lak. Gơñu pơdah thâo rup, tơlơi pơhing ƀing ngă soh tơlơi phiăn jơlan glông. Ƀuhda phrâo anai, lu tơlơi pơhing rơdêh pơjrom, bruă hyu djru ba pơklaih mơnuih amăng mông ječ ameč amăng kual ia ling dăo ƀơi hơdôm să kual gah ngŏ tơring čar, jing ƀơi tơring čar Phú Yên hơđăp. Kâo juăt pơlar glăi tơlơi pơhing anun, hơđong ƀiă huăi hŭi tơlơi pơhing tă tăn ôh”.

Ngă tui tơlơi git gai mơ̆ng Ding jum kông an kơ bruă pơblih yua mrô, ba yua boh thâo ia rơgơi phrâo amăng bruă mă, lu sang bruă gah kông an Dak Lak lêng kơ čih pơkra plang fanpage soh. Mơ̆ng anun, tơhan kông an pơtrut bruă ngă pôr pơthâo, pơtô ba tơlơi phiăn; tŭ mă tơlơi pơhing ană plơi lăi pơthâo, djru ba pơgang tơlơi rơnuk rơnua hơđong hăng bơkơdong glăi tơlơi soh sat. Trung tá Trần Viết Nghĩa, Khua grup hyu pơtô pơhrăm bruă kơđi čar sang bruă kông an tơring čar Dak Lak brơi thâo, plang fanpage “Kông an Dak Lak” yua kơ anom bruă gơñu pô pơjing, giăm 9 klăk wơ̆t arăng sem. Ƀu kơnong pôr tơlơi pơhing tơlơi phiăn kơnuk kơna đôč ôh, dŏ pôr pơthâo lu tơlơi hơmâo, tơlơi pơhing lăi pơthâo bruă ngă soh tơlơi phiăn mơ̆ng mơnuih ƀôn sang pơthâo brơi, laih anun iâu pơthưr bruă mă tơlơi gum pơgôp, kah pơpha, djru nao rai mơnuih ƀôn sang hơmâo tơlơi truh lŏn adai ngă.

“Amăng tal ia ling dăo phrâo anai, ƀơi să Hòa Thịnh hơmâo sa čô đah kơmơi pi kian truh hrơi đih apui samơ̆ yua ia ling dăo guang dar hĭ. Tơlơi pơhing gơmơi pôr pơthâo amăng fanpage hăng giong anun ƀing tơhan djru nao, hơmâo kông an să Hòa Thịnh nao čơkă tŭ, ba pô pi kian anun nao pơ sang ia jrao hmao kru. Kâo ƀuh bruă ngă anun hmao kru, rơđah rơđong biă mă yua tơlơi pơhing mơ̆ng fanpage mơ̆n pơthâo kơ mơnuih ƀôn sang”.

Sa plang fanpage pôr tơlơi pơhing tŭ yua pơkŏn mơ̆ng sang bruă kông an Dak Lak, anun lĕ Anom bruă tơhan pơlih jơlan glông Dak Lak. Fanpage anai hơmâo 33.000 čô mơnuih ĕp, hơmâo truh ha mơkrah klăk wơ̆t sem rim blan. Anai lĕ plang tơlơi pơhing lăi pơthâo tơlơi phiăn jơlan glông, hmao kru lăi pơthâo lu tơlơi pơhing pơdjơ̆ nao hơmâo tơlơi ƀơi jơlan glông hăng rung răng amăng plơi pla. Kơnang kơ fanpage, tơhan pơlih jơlan glông tŭ mă rup, klip video mơnuih ƀôn sang pơdah thâo kơ tơlơi soh ƀơi jơlan glông, bruă arăng sĭ mơdrô gơnam kơnuk kơna kom….Trung tá Nguyễn Khiếu Nam Vũ, wai lăng plang fanpage Tơhan pơlih jơlan glông tơring čar Dak Lak brơi thâo:

“Anom bruă gơmơi hơmâo sa bơnah plang tơlơi pơhing krăp tŭ mă tơlơi pwohing mơ̆ng mơnuih ƀôn sang mơ-it. Mơ̆ng anun, anom bruă hơmâo pơsir  giăm 100 mơta tơlơi soh, hăng rơnoh prăk đŭ 300 klăk. Bơmhutu, plah wah amăng blan 12 laih rơgao, mơ̆ng tơlơi lăi pơthâo mơnuih ƀôn sang mơ-it nao clip video 2 boh rơdêh blă ča ƀu găl, nao ĕp lăng, pơsit hăng đŭ prăk dua boh rơdêh pơgiăng tuai anun. Rơđah biă mă ñu, tơlơi pơhing ơi D.V.P dŏ pơ să Tuy Đức, tơrin čar Lâm Đồng, mơgăt rơdêh mrô 48B-000XX, arăng đŭ 5 klăk prăk hăng mă lui 2 puang amăng hră mơgăt rơdêh ñu”.

Abih bang amăng anom bruă tơlơi pơhing hăng kông an 102 boh să, phường yua kông an Dak Lak wai lăng hơmâo čih pơkra plang fanpage soh, lu tơlơi pơhing pơhưč mơnuih ƀôn sang mut ĕp tong ten, hơmâo fanpage hơdôm rơtuh rơbâo wơ̆t arăng ĕp lăng. Boh yom phun pôr tơlơi pơhing djơ̆ hơdră, sit nik tong ten, mơ̆ng bruă pơtô ba tơlơi phiăn truh kơ bruă pơgang tơlơi rơnuk rơnua, bruă mă pơgang ba mơnuih ƀôn sang, djru pơklaih amăng mông ječ ameč, hơmâo lar hyu hiam klă laih anun tơlơi pơhing gah lui tơlơi soh sat hơmâo ba glăi boh tŭ yua. Ơi Nguyễn Quốc Hiệp, Kơ-iăng khua  Gơnong bruă Gru grua Pơrơguăt drơi jăn hăng Tuai čuă ngui tơring čar Dak Lak lăi anai lĕ hơdră pôr tơlơi pơhing djơ̆ găl hăng anăp ngă tui ba yua ia rơgơi mrô.

“Thun blan pơ anăp, Gơnong bruă  gơmơi amra ngă hrŏm tong ten hloh hăng lu anom bruă amăng tơhan kông an Dak Lak kiăng kơtưn pơtô pơblang lu hloh, djru mơnuih ƀôn sang tŭ mă tañ tơlơi pơhing, hmao kru pôr amăng fanpage tơhan kông an truh pơ mơnuih ƀôn sang hmư̆. Pôr pơthâo, lăi brơi plang anai truh pơ mơnuih ƀôn sang, biă mă ñu kual ataih, kual asuek, plơi pla mơnuih djuai ƀiă dŏ, thâo ten kơ plang fanpage lu hloh”.

Ƀuh rơđah, lu plang fanpage mơ̆ng kông an Dak Lak ƀu kơnong plang tơlơi pơhing phun ôh, dŏ jing plang tơlơi pơhing amăng internet, jĕ giăm, hmar hăng đăo kơnang biă mă kơ mơnuih ƀôn sang. Ƀơi anun, tơlơi pơhing kah pơpha hmar, djơ̆ tong ten; lăi nao lu tơlơi pơhing mơnuih ƀôn sang hmư̆, pơsir hmao kru, djru pơgang tơlơi rơnuk rơnua hơđong, bang bơngač rơđah pran jua mă bruă yua kơ mơnuih ƀôn sang amăng rơnuk ba yua ia rơgơi mrô.