Lơ 4/9, ƀơi lu anih amăng 3 boh tơring glông kual čư̆ siăng Kon Tum, hơmâo: Đak Glei, Tu Mrông hăng Kon Plong hơmâo hơjan. Ăt đing nao kơ tơlơi pơhing bơbeč djơ̆ mơ̆ng kơthel mrô 3, ngă rai lu hơjan, hŭi biă mă hơmâo tơlơi truh lŏn tơhlŏm amăng tơring, anom bruă pơtô hăng pơjuăt hăng gong gai kơnuk kơna ƀơi hơdôm tơring glông amăng Kon Tum hơmâo prăp lui laih hơdră či pơphun jơnum mut thun hrăm phrâo amăng hrơi adai hơjan hlim ia ling dăo.

Khua mua sang hră hơmâo pơtă pơtăn kơ ƀing amĭ ama čơđai sang hră pioh mông nao hrŏm ană bă pơ sang hră mông mut thun hrăm phrâo kiăng pơhlôm rơnuk rơnua. Thun hrăm 2024-2025 tơring čar Kon Tum hơmâo rơbêh 170.000 čô čơđai sang hră djop gưl mơ̆ng gưl muai truh anih 12, amăng anun hơmâo 45.000 čô čơđai mut hrăm anih akŏ gưl. Kiăng kơ hrơi jơnum mut thun hrăm phrâo lơ 5/9 jing Hrơi mơak abih bang ană plơi pla ba ană bă nao sang hră, mơ̆ng akŏ blan 8 laih rơgao, Gơnong bruă Pơtô hăng Pơjuăt tơring čar Kon Tum hơmâo akŏ pơjing 6 grup hyu ĕp lăng, sem glăi bruă prăp lui kơ thun hrăm phrâo ƀơi abih bang sang hră, anom bruă pơtô hăng pơjuăt amăng 10 boh tơring glông, plơi prong lơ̆m tơring čar.