Tŏ tui hrơi mông rai čuă sit nik dêh čar Việt Nam, mơmŏt lơ 1/11, tơdăm phu Đan Mạch Phrê-đơ-rích hăng bơnai ñu Me-ri Ê-li-da-bet nao pơhmư̆ mông ngă lơphet hơdor glăi 50 thun akŏ pơjing bruă pơtom hiăp Việt Nam - Đan Mạch. Nao jơnum hrŏm hơmâo Kơ-iăng khua mir sir yă Võ Thị Ánh Xuân hrŏm hăng khua mua mơng Ding jum, gơnong bruă, ƀon lan hăng anom bơwih ƀong sĭ mơdrô mơng dua bơnah. Đĭ pơhiăp amăng mông ngă lơphet, Kơ-iăng Khua mir sir yă Võ Thị Ánh Xuân lăi rơđah Việt Nam hăng Đan Mạch sit nik akŏ pơjing bruă pơtom hiăp amăng thun 1971, anai lĕ hơdôm bruă blung a kiăng pơtrut tơlơi rô nao rai ngă hrŏm mơng dua bơnah.

Kơ-iăng khua mir sir yă Võ Thị Ánh Xuân đĭ pơhiăp amăng mông ngă lơphet

Dong mơng anun, Đan Mạch lĕ sa amăng hơdôm dêh čar djru brơi yôm hloh kơ dêh čar Việt Nam, pơgôp prong prin amăng pơđĭ kyar bơwih ƀong haư-mơnuih mơnam jai hrơi klă tui ƀơi Việt Nam ră anai. Găn rơgao hơdôm pluh thun pơđĭ kyar, tơlơi rô nao rai dua bơnah hơmâo pơplih mơng tơlơi rô nao rai ngă hrŏm pơđĭ kyar gru grua hơdai nao tơlơi rô nao rai bơkơnar, ba glăi tơlơi dưi hăng akŏ pơjing tơlơi rô nao rai ngă hrŏm djop mơta amăng thun 2013. Tui tơdăm phu, Đan Mạch glăk lĕ dêh čar ngă hrŏm sĭ mơdrô - tuh pơ alin yôm phăn hăng Việt Nam hăng amra tŏ tui gum hrŏm ba glăi tŭ yua, đăo gơnang hăng Việt Nam amăng djop mơta bruă ngă hrŏm mơng ayuh hyiăng, ngă hmua, ia jrao hăng pơtô pơjuăt.