Ƀrô hơdor glăi tal 62 thun hrơi gru grua tơhan pơlih pơhlôm, pơgang apui ƀong sang hăng pơklaih mơnuih amăng mông ječ ameč, 22 thun abih bang mơnuih mơnam ngă hrŏm pơhlôm, pơgang apui ƀong sang, tlam mơmŏt lơ 28/9, ƀơi Sang jơnum gru grua mă bruă giăng mah Việt Xô hơmâo pơphun hơdră “Jak iâu abih bang mơnuih gum hrŏm pơhlôm, pơgang apui ƀong sang, pơklaih mơnuih mông ječ ameč” yua Ding jum kông an ngă hrŏm Gong phun podah rup Việt Nam pơphun. Khua git gai pơ ala mơnuih ƀôn sang dêh čar ơi Vương Đình Huệ nao jơnum hrŏm.

Ƀơi mông jơnum anai, hơmâo apah bơni, pơpŭ kơ hơdôm bruă mă hiam klă, khin hơtai, boh tơhnal tŭ yua amăng bruă mă mơ̆ng tơhan pơlih pơčruih apui hăng mơnuih ƀôn sang djru pơčruih apui ƀong sang, pơklaih mơnuih amăng mông ječ ameč truh; hơdor bơni kơ ƀing tơhan, mơnuih hơmâo tơlơi truh pơyơr pran jua yua kơ bruă mă pơklaih mơnuih mơnam amăng mông ječ ameč truh thun blan rơgao. Pơ anăp anai, tơlơi pơhing apui ƀong sang, boh pơtuh ngă, tơlơi či truh sat aka ƀu dưi thâo lui hlâo ôh, anun kiăng djop mơnuih khom kơđiăng, ngă tui klă hơdră pơhlôm pơgang apui ƀong sang djơ̆ hơdră laih anun ngă bruă djru pơklaih mơnuih amăng mông ječ ameč, kiăng ngă djơ̆ bruă mă amăng rơnuk phrâo pơgang tơlơi rơnuk rơnua kơ abih bang mơnuih mơnam.