Hăng tơlơi gal mơng ayuh hyiăng lŏn mơnai, Gia Lai hơmâo pơjing hăng pơđĭ kyar lu kual ngă đang hmua tum pơƀut ha anih. Lu gơnam đang hmua phun ba glăi pơhrui lu hloh lơm dưi ba sĭ mơdrô pơ 40 boh dêh čar, kual lŏn. Ră anai tơring čar hơmâo 3 kual tuh tia pơkra ming, hăng dưm dăp man pơkra 23 anih tuh tia pơkra ming. Gơnam đang hmua amăng tơring čar lu hăng pơhlôm hơđong hơmâo: kơphê, kơsu, tơbâo, hơbơi plum, če, boh troh … anai lĕ akŏ phun kiăng pơđĭ kyar bruă pơkra pơjing gơnam.

Amăng mông jơnum, ƀing khua mua mơng hơdôm anom bruă gah Ding jum sĭ mơdrô hăng tuh tia pơkra ming, khul pơlir sĭ mơdrô gơnam hăng hơdôm anom bruă tuh pơ alin, anom bơwih ƀong sĭ mơdrô hơmâo pơgôp hiăp kiăng pơđĭ kyar logistics ƀơi Gia Lai. Ƀing khua mua brơi thâo kiăng hrưn đĭ klă dong mơng logistics, tơlơi gơgrong mơng logistics hăng bruă pơđĭ kyar bơwih ƀong huă-mơnuih mơnam, anăp nao bơwih ƀong sĭ mơdrô pơlir hăng pơtrut pơđĭ kyar logistics hăng ngă hrŏm kơplah wah anom bơwih ƀong sĭ mơdrô amăng tơring čar hăng gah rơngiao.