VOV4.Jarai - Ƀơi tơring čar Kon Tum mơng 11 mông mlăm tom brơi (27/9) pơphun hơmâo hơjan prong. Truh mơguah anai lơ 28/9 hrŏm hăng hơjan, angin glăk kơtang tui mơn, laih anun kơthel mrô 4 ba truh tơlơi răm rai blung a. Tơlơi pơhing mơng Jơnum min mơnuih ƀon sang tơring glông Kon Plong, tơring čar Kon Tum, giăm hăng tơring čar Quảng Ngãi, yua hơmâo hơjan kơthel, ră anai 5 boh să mơng tơring glông kah hăng Đăk Nên, Măng Ƀút, Đăk Ring, Đăk Tăng hăng Pờ Ê thăm apui laih. Hơdôm boh tơring glông: Tu Mơ Rông, Kon Plong, Đăk Glei...hơmâo sang tơpok pơbung tôl; hơmâo anih lŏn tơhlŏm, ia dăo ƀơi jơlan nao rai.

Rup pơƀuh tơlơi răm rai yua kơthel mrô 4 ngă ƀơi tơring glông Tu Mơ Rông.

Kiăng rơnuk rơnua tơlơi hơdip hăng dram gơnam kơ ană plơi, mơng tlam hăng mlăm tom brơi, hơdôm boh tơring glông amăng tơring čar hơmâo ba pơđuăi năng ai 600 boh sang anŏ hăng rơbêh 2.500 čô mơnuih tơbiă đuăi mơng kual plung, anih amuñ tơhlŏm, nao dŏ pơ anih hơđong, kơđap kơthel.

Siu H’Mai: Pơblang