Ƀrô djơ̆ tal anai, anom bruă tơdăm dra mut phung tơring čar Dak Lak pơphun pơkă lăng tơlơi duăm ruă, ƀok ia jrao hăng pơtô brơi hơdră pơgang suaih pral kơ hơdôm rơtuh čô mơnuih ƀôn sang, ƀơk hơdôm hơpluh anung gơnam kơ hlăk ai mut phung hơđăp, jing ƀing kơsung nao hlâo; ngui hrom pơplông rơjang drơi jăn, pah boh lông, pơdah tơlơi adoh suang hrom hăng pơphun tal bơkơtưn mă bruă kiăng čơkă Jơnum ruah khua anom bruă tơdăm dra mut phung dêh čar tal 12.

Amai H’Giang Niê, Khua anom bruă tơdăm dra mut phung tơring čar Dak Lak brơi thâo, rơnoh prăk ngă tui hơdră anai hơmâo 250 klăk prăk. Anai lĕ sa tơlơi gir run mơ̆ng anom bruă khul grup tơdăm dra mut phung amăng bruă pơtum mơnuih ngă bruă anăp nao pơ kual plơi pla, boh nik ñu amăng hrơi mông dêh čar ta phrao găn rơgao klin kheng ngă, tơlơi bơwih ƀong huă, bruă pơkra ming sĭ mơdrô dŏ lu tơlơi tơnap tap.