Ƀơi Dak Lăk, hmư̆ hing lĕ mlăm adoh countdown (yap mrô kơđai) ƀơi tơdron lăk 10/3, phường Buôn Ma Thuột mlăm lơ 31/12 hăng jơlan hơdră adoh suang “Hiam ƀhêm Dak Lăk - Čơkă thun phrâo 2026”. Jơlan hơdră hơmâo prăp rơmet tong ten, kơdrưh biăm hơmâo goong brô̆, adoh suang, apui jă hăng măi mok rơnuk phrâo, hơmâo lu mơnuih adoh, grup pĕ goong adoh suang, DJ hmư̆ hing hăng ƀing rơguăt pơƀuh rai anŏ hiam anŏ mơak. Hrŏm hăng anun, mơguah lơ 1/1/2026, ƀơi Mũi Đại Lãnh (Mũi Điện) să Hòa Xuân, hơmâo ngă yang Kơkuh hla gru čar čơkă thun phrâo, hrŏm hăng čơkă tuai blung a nao ngui pơ anih hơmâo lăng jing anih čơkă yang hrơi ƀlĕ tañ hloh ƀơi Việt Nam. Pơ anai, hơmâo tơlơi adoh suang čơkă thun phrâo, pĕ goong atông brô̆ đưm hăng lu bruă brơi pơpŭ kơ ƀing tuai nao ngui...

Tlam mơmŏt kơñ lơ 31/12, tơring čar Gia Lai pơphun pơdah rup tivi pơtruh na rai hăng lu anih hăng anăn Countdown Tết Dương lịch thun 2026, kiăng akŏ pơjing tơlơi hơ̆k mơak čơkă thun phrâo, bang bơngač tơlơi gum pơgôp pran jua, hơđong hloh hăng čang rơmang pơđĭ kyar. Jơlan hơdră pơdah rup mơ̆ng tivi pơtui hmao klôn anai akŏ ñu “Tŭi apui hơtai boh-Pơtruh nao rai tơlơi khăp pap”, pơtui jua pơhiăp pơdah tivi pơtruh nao rai ƀơi dua bit anih phun: Mơ̆ng tơdron lăk Nguyễn Tất Thành, phường Quy Nhơn hăng tơdron lăk Đại Đoà kết phường Plei Ku, hăng lu khul adoh suang hơmâo prăp lui hlâo mơak biă mă, lir hơbit adoh suang rơnuk phrâo, pơčrang apui bơngač hiam rô̆ hăng pơnang pơdah rup prong LED. Biă mă ñu ƀơi Plei Ku, pơdah thâo gru grua tơlơi adoh suang mơak djuai ania kual Dap Kơdư, hơmâo atông čing taih hơgor yut suang arap mơak biă mă tui yŭ suang glai klô čư̆ siăng, pơdah rai tơlơi mơak pơmut hrŏm gru grua hiam đưm hăng adoh suang rơnuk anai. Kơnang kơ lu črăn tơlơi adoh suang anun, tơring čar Gia Lai čang rơmang  anŏ kiăng lăi pơthâo, pơdah brơi rup rap, pran jua kơtang hiam klă amăng thun phrâo 2026, Gia Lai pơphun bruă čơkă tuai ƀrô Thun pioh čơkă tuai gưl dêh čar.

Tơring čar Quảng Ngãi pơphun jơnum gru grua, tuai čuă ngui ƀơi ter hang ia rơsĭ hăng čư̆ siăng. Jơlan hơdră adoh suang “Quảng Ngãi - Čơkă thun phrâo 2026” pơphun mơmot lơ 31/12 ƀơi dua bit anih: Tơdron lăk jơlan Phạm Văn Đồng, phường Cẩm Thành hơmâo anăn “Kơtưn nao pơ ia rơsĭ prong” hăng ƀơi Tơdron lăk 16/3, phường Kon Tum hăng anăn “Jua suă pran lŏn dap kơdư”. Tŏ tui dong, Rơwang gru grua - tuai čuă ngui Măng Đen hăng anăn “Ia ƀhêm ƀơi dap kơdư”, pơphun mơ̆ng lơ 1-4/1/2026, ƀơi să Măng Đen. Rơwang hrơi tơjuh ngui ngor hơmâo pơpor đĭ khinh khí cầu, adoh suang “Măng Đen hrơi phrâo”, sang čơ gơnam mơ̆ng hmua - ia jrao akha Măng Đen 2026, sem lăng arăng pơkra hna kơphê, mơñum lăng kơphê jơman, hrŏm hăng tour hyu ngui amăng glai klo.