Ơ neh met wa, ƀing apăn bruă hăng ling tơhan đơ đam dêh čar!

Sa bơyan bơnga dong truh laih hrŏm abih bang mơnuih, djop sang anŏ, plơi pla ala ƀôn!

Amăng hrơi mông tơkuh nao rai yôm phăn mơng ayuh hyiăng lŏn mơnai thun sô rơgao, thun phrâo truh, ƀing ta hơdor tơngia tơlơi gum pơgôp mơng rơnuk ơi yă, amĭ ama, met neh, adơi ayong anong wa đưm hlâo hơmâo akŏ pơjing, wai pơgang lŏn ia ta, kiăng hơmâo sa bơyan bơnga rơnuk rơnua, brơi mơnuih ƀôn sang hơdip rơngai, trơi pơđao, yâo mơ-ak, ba glăi tơlơi dưi, tơlơi gal, kơdrưh ang, tơlơi đăo gơnang mơng lŏn ia ta ră anai.

Amăng hrơi mông hok mơ-ak, pơđao pran jua, hing ang čơkă thun phrâo tui phiăn juăt djuai ania ta, pơ ala brơi khua mua Ping gah, kơnuk kơna, kâo abih pran jua mơ-it nao abih bang mơnuih ƀôn sang, ƀing apăn bruă hăng ling tơhan đơ đam dêh čar, laih dong neh met wa dŏ hơdip pơ tač rơngiao hăng pran jua jê̆ giăm hloh, tơlơi tơña bla hăng tơlơi pơpŭ thun phrâo hiam klă hloh. Mơ-it nao gơyut gơyâo amăng hơdôm boh kual, mơnuih ƀôn sang djop dêh čar amăng rŏng lŏn tơnah tơlơi pơpŭ rơnuk rơnua, ngă hrŏm, giang mah hăng pơđĭ kyar hơđong kjăp!

Amăng thun laih rơgao, hăng pran gum pơgôp, tơlơi gir run mơng Ping gah, abih bang mơnuih ƀôn sang hăng khul ling tơhan, dêh čar ta hơmâo pơsit tong kơdrưh ang phrâo, tơlơi dưi prong mơng dêh čar Việt Nam akĕ phĭ găn rơgao tơnap tap, lêng kơ gir run kiăo tui hơdôm tơlơi hiam klă hloh, yua kơ tơlơi dưi mơnuih ƀôn sang, hơmâo lu boh than dưi ngă yôm phăn, djop mơta amăng djop bruă hăng hơdôm tơlơi pơđŏm glăi yôm hloh; jing gơyut gơyâo hơdip tơpă sit, đăo gơnang hăng djop dêh čar, hơmâo abih bang mơnuih amăng rŏng lŏn tơnah pơpŭ lăng yôm.

Amăng bơyan tơkuh nao rai lĕ hrơi mông hing ang kiăng ƀing ta lăng glăi hơdôm tơlơi găn rơgao, pơmĭn nao pơgi kơdih hơmâo hiam klă brơi rĭm čô mơnuih, rĭm boh sang anŏ hăng djop djuai ania. Kâo đăo gơnang abih pran jua lĕ, tui pran kơtang mơng gum pơgôp djop djuai ania hăng hơdôm anŏ yôm phara mơng gru grua, ană mơnuih dêh čar Việt Nam, lăng yôm kơnuih, tơlơi thâo thăi hăng pơtrut tơlơi pơčeh phrâo mơng rĭm čô mơnuih, pok phư hơdôm tơlơi dưi, amuñ mă yua hơdôm rơnoh, amra pơjing rai pran kơtang amăng lăm, kiăng djuai ania ta kjăp pran hrưn đĭ dưi ngă hơdôm tơlơi dưi prong ƀiă dong.

Bơyan bơyan pok rai hơdôm tơlơi čang rơmang phrâo hăng pok pơphun hơdôm tơlơi hiam klă hloh, pơđao pran jua hăng hur har pran hơdip. Amăng hrơi mông čơkă bơyan bơnga mơng ayuh hyiăng rơhuông adai hăng bơyan bơnga mơng pran tum jơngum, mut hrŏm, ƀing ta amra čơkă mă hơdôm tơlơi pơtrut phrâo, jao nao rai hơdôm tơlơi čang rơmang hiam klă hloh, pơpŭ kơ djuai ania ta tŏ tui na nao, brơi kơ lŏn ia ta jai pơdrong asah, hiam klă, pơhlôm brơi tơlơi hơdip mơnuih ƀôn sang jai hrơi trơi pơđao, yâo mơ-ak!

Pơpŭ kơ abih bang mơnuih ƀôn sang, ling tơhan, rĭm boh sang anŏ, rĭm čô mơnuih dêh čar Việt Nam hiam drơi jăn pran jua, truh kih, yâo mơ-ak!

Thun phrâo, hrưn đĭ phrâo, gir run phrâo, tơlơi truh kih, tŭ yua  phrâo!

Pơpŭ bơni, hơ-ơč hmưi kơ abih bang hiam drơi jăn na nao!