Anai lĕ thun hrăm hmâo gru pơđom pioh yôm phăn lơm Jơlan hơdră pơtô pơhrăm tui jơlan gah phrâo, pok pơhai ha amăng plĕ mơ̆ng anih sa truh anih 12. Ƀrô djơ̆ tal mut thun hrăm phrâo 2024-2025, Khua git gai Ping gah, Khua mir sir dêh čar ta ơi Tô Lâm hmâo laih hră mơ-ĭt kơ Gơnong bruă pơtô pơhrăm.

Amăng hră hmâo črăn: Ƀrô djơ̆ tal pok phun thun hrăm phrâo 2024-2025, kâo mơ-ĭt hră truh kơ ƀing nai pơtô čơđai sang hră, mơnuih wai lăng, mơnuih mă bruă hmâo hăng glăk hmâo mă bruă amăng Gơnong bruă pơtô pơhrăm, hrŏm hăng ƀing čơđai sang hră, ƀing hrăm gưl dlông hăng ƀing amĭ ama čơđai sang hră hơdôm pran jua kiăng khăp hăng hơdôm tơlơi hơ-ưč hmưi klă hiam hloh. Hăng tơlơi mơ-ak mơ̆ng thun hrăm phrâo, kâo pơmin ƀing čơđai sang hră, ƀing hrăm gưl dlông, ƀing kơsem min amra gir run hrăm hră, pơhrăm pô, tŭ mă hăng ngă pô bôh thâo, pơjing hơdôm bôh thâo phun, pơjing hơdôm tơlơi čang rơmang prong prin pioh pơdŏng lŏn ia jai hrơi jai đĭ kyar, yâo mơ-ak. Hơ-ưč hmưi ƀing nai pơtô, mơnuih wai lăng, mơnuih mă bruă Gơnong bruă pơtô pơhrăm hăng ƀing čơđai sang hră, ƀing hrăm gưl dlông, kơsem min suaih pral na nao, yâo mơ-ak, truh kih hăng hmâo lu bôh than hloh dong amăng thun hrăm phrâo./.