Hăng tơring čar Dak Lak, tơring čar tong krah ƀơi kual Dap Kơdư, hră pơtrun anai ngă gêh găl kơ pơđĭ kyar prong, laih dơ̆ng amra bưp ƀu ƀiă ôh tơlơi lông lăng amăng glông bruă kơđi čar. Hương Lý, pô čih tơlơi pơhing Gong phun jua pơhiăp Việt Nam ƀơi kual Dap Kơdư hơmâo tơlơi tơña kơ ơi Nguyễn Đình Trung, ding kơna ping gah dêh čar, Khua git gai Ping gah tơring čar Dak Lak lăi nao kơ anŏ gêh găl, lông lăng, hrom hăng anăp ngă bruă kiăng ngă tui tŭ yua hră pơtrun yôm anai.

Ơ ơi, Hră pơtrun 23 mơ̆ng Ding jum kơđi čar hlăk pok pơhư tơlơi gêh găl pơđĭ kyar amăng kual Dap Kơdư. Hăng anŏ hơmâo phara tơring čar Dak Lak hră pơtrun anai amra pơtrut pơđĭ kyar hiư̆m pă ?

Ơi Nguyễn Đình Trung: Ta dưi lăi hră pơtrun 23 mơ̆ng Ding jum kơđi čar čih pơkra 1 yak rơbat yôm amăng bruă pơđĭ kyar bơwih ƀong huă mơnuih mơnam, pơgang hơđong rơnuk rơnua ƀơi kual Dap Kơdư lăi hrom Dak Lak hnun mơ̆n. Hrom hăng hơdră ngă phrâo hơmâo kơnuk kơna pơtrun amăng anun ngă rơđah tui 23 mơta bruă mă phun, 9 kơčăo bruă tuh pơ alin pơkra jơlan glông pơtruh nao rai amăng kual Dap Kơdư. Dak Lak lĕ tơring čar amăng kual Dap Kơdư hăng hơmâo anih dŏ yôm phara biă mă amăng kual. Anai lĕ, hơdôm atur phun pok prong lu tơlơi gêh găl phrâo kơ tơring čar Dak Lak dưi pơđĭ tui, mă yua ba glăi boh tơhnal lu hloh mơ̆ng anŏ gêh găl, kiăng găn rơgao tơlơi lông lăng anun pơjing anŏ pơblih phrâo, kơtang hloh pơđĭ kyar bơwih ƀong huă mơnuih mơnam, pơgang lŏn ia.

Tơring čar Dak Lak pơtong sit hơdôm tơlơi tơnap tap amăng bruă mă ngă tui anun lĕ: tơlơi pơhno nao rai prong lơ̆m mut phung bơwih ƀong huă, ba gơnam sĭ mơdrô mơ̆ng đang hmua. Dua lĕ, mơnuih mă bruă lu samơ̆ mrô mă bruă kơhnâo kơhnăk lĕ aka ƀu lu ôh. Tơlơi tal 3 dơ̆ng, Dak Lak ăt jing tơring čar ƀun rin đôč aka dưi ĕp mă prăk kơ pô ôh, mrô sang anŏ ƀun rin amăng kual mơnuih djuai ƀiă amăng kual dŏ lu, ngă đĭ tui tơlơi ƀu hơđong amăng tơlơi hơdip mơda mơnuih mơnam.

-Tui anun, tơring čar hơmâo tơlơi ngă hiư̆m pă kiăng găn rơgao hĭ tơlơi tơnap tap lông lăng anun, pơđĭ tui tơlơi kơtang mơ̆ng pô pioh ngă tui tŭ yua hră pơtrun anun, ơ ơi ?

Ơi Nguyễn Đình Trung: Anŏ pơsit hmar tañ hloh lĕ man pơdong hăng pok pơhai lu hơdră či ngă mơ̆ng tơring čar pioh ngă tui hră pơtrun mơ̆ng Ding jum kơđi čar, ngă tui hơdră mă bruă mơ̆ng Kơnuk kơna. Dua lĕ, ngă giong bruă dăp pơkra, pơsit hĭ hăng pok pơhai ngă tui akŏ bruă tơring čar Dak Lak mơ̆ng thun 2021-2030 hăng lăng nao pơ anăp adih truh thun 2050. Pơkă hnong abih bang djơ̆ hnong dêh čar pơtrun, pơkă hnong bruă dêh čar hăng pơkă kual Dap Kơdư. Klâo lĕ, ăt pok pơhai ngă tui klă hloyh tơlơi gêh găl hlăk hơmâo.

Biă mă ñu, kơnang kơ 4 tơlơi gơgrong phun anun lĕ:  Pơđĭ kyar  bruă pơkra gơnam sĭ mơdrô kyâo pơtâo, boh čroh lu hăng prong; pơđĭ kyar ba yua măi mok pơkra ming boh čroh đang hmua, mơnong akan hơdang hăng yua apui lơtrik pơkra ming glăi; pơđĭ kyar bơwih ƀong huă amăng kual plơi prong, ming pơkra bơnư̆ pơkong ia, pơđĭ kyar bơwih bơwang logistic kơnang kơ mrô, bơwih ƀong huă yua mrô, wai lăng mơnuih hăng mrô. Amăng anun, pơđĭ kyar plơi prong Ƀuôn Ma Thuôt jing anih anom phun amăng kual Dap Kơdư tui hră klah čun mrô 67 Ding jum Kơđi čar.

 Laih dơ̆ng, tơring čar amra pơtô lăi, ngă tui djơ̆ kiăng abih bang tŭ ư sa pran jua djop anom bruă, djop gưl brơi ngă tui djơ̆ hnong pơtrut kơtang ngă hrom pơjing rai anih dŏ mă bruă pơsir hĭ tơlơi dŏ kơđông, pơđĭ tui tơlơi pơhno, pơtrut tơlơi gêh găl amăng kual. Ngă tui tŭ yua djop jơlan hơdră djru ba tơlơi hơdip mơda mơnuih ƀôn sang. Boh nik ñu, mơnuih djuai ƀiă, djru pơgang hrom rơnuk rơnua amăng kual.

Amăng lu plang tơlơi pơhing amăng kual Dap Kơdư, pok pơhai hơdôm kơčăo bruă prong yôm. Samơ̆ lu tơring čar amăng kual, hơdôm kơčăo bruă prong bưp lu tơlơi gun hĭ. Ƀơi Dak Lak tơlơi anai hiư̆m ñu laih anun ngă hiư̆m pă dưi ngă tui dong pơgăn brơi huăi tơ̆i dơnuai lơ̆m pok pơhai kơčăo bruă, pơtrut pơđĭ kyar, ngă djơ̆ tơhnal pơtrun lăi amăng Hră pơtrun mrô 23?

Ơi Nguyễn Đình Trung: Kiăng pơđĭ hloh dơ̆ng boh tŭ yua rơnoh prăk tuh pơ alin hăng pơđĭ tui hloh boh tŭ yua mơ̆ng Hră pơtrun Ding jum kơđi čar pơkă, tơring čar Dak Lak hơmâo ƀuăn pơđĭ tui hloh pran jua mă bruă gơgrong ba, ngă tơlơi bơ tŭ ư hrom sa hnong amăng bruă ngă tui lơ̆m pok pơhai; pơtong sit tơlơi gơgrong glăm ba mơ̆ng djop sang bruă, rĭm anom bruă ngă tui gơnong dlông, djop tơring čar amăng kual pioh pok pơhai.

Amăng bruă pơhưč ĕp prăk tuh pơ alin kơ djop kơčăo bruă phun, ăt khom jak iâu djop anom bruă amăng mơnuih mơnam djru hrom tuh pơ alin pơkra jơlan glông, sang bruă phun. Ăt pơtrut ngă pơgiong tơlơi phiăn, bruă mă pơhưč tuh pơ alin sem lăng bruă mă wai lăng mơ̆ng kơnuk kơna pơblih hơdră mă bruă, pơblih tuh pơ alin. Laih dơ̆ng dăp glăi đing nao hlâo tơdơi, akŏ tlôn hơdôm kơčăo bruă laih anun kah pơpha prăk kăk tuh pơ alin, khom tuh pơ alin giong sa bruă tañ giong, ba yua kiăng pơđĭ tui boh tơhnal tŭ yua amăng tơhnal pơtrun bơwih ƀong huă mơnuih mơnam, mơ̆ng anun djru hrom pơđĭ kyar kơ abih bang amăng kual hăng amăng dêh čar.

Ơ bơni kơ ih hŏ!