Tui hăng ƀing pơ ala nao jơnum, rơwang bruă jơnum ping gah tal XIII laih rơgao, Khul apăn bruă ping gah dêh čar, Ding jum kơđi čar, Khul git gai ping gah dêh čar tong ten, kơjăp phip, gum pơgôp, tŭ ư sa hnơ̆ng, pơgang djơ̆ tơlơi phiăn pơtrun mă bruă, kiăo tui tơlơi pơmin kiăng, jơlan hơdră, git gai lŏn ia găn rơgao tơlơi tơnap tap, lông lăng, ngă giong djop tơhnal pơkă, bruă mă tui Hră pơtrun jơnum ruah khua ping gah tal XIII pơtrun, amăng anun lu bruă mă, ngă tui tŭ yua hiam klă hloh. Bơkơtuai ƀơi grup, Khua dêh čar ơi Phạm Minh Chính lăi pơtong tơlơi hrăm mơ̆ng tơlơi gum pơgôp:

 “Bruă mơta sa lĕ gum pơgôp. Ƀu hơmâo tơlơi gum pơgôp lĕ sit mơ̆n ƀu hơmâo ôh ră anai. Ƀing ta kiăo tui tong ten, kơjăp phik tơlơi gum pơgôp amăng khul, gum pơgôp hăng jar kmar hnun kah ƀing ta mơ̆ng hơmâo kơnuih hmư̆ hing ƀiă, dưi hơmâo tơlơi pơhiăp arăng hmư̆. Anun yơh sa tơlơi phun aliăng lăng yom hloh. Pơblang rơđah ƀơi anai lĕ, abih bang amăng ping gah wơ̆t hăng amăng anom bruă ƀơi tơring čar, plơi pla hai khom thâo rơđah tơlơi gum pơgôp. Gum pơgôp khom thâo hluh nao rai tơdruă, kah pơpha, ƀơi anŏ khom pơsăn drơi pô”.

Lu tơlơi pơgôp hiăp lăi pơtong dơlăm hloh bruă lăng nao pơ anăp adih rơnuk hrưn đĭ pô hăng khut khăt kiăo ngă tui tơhnal pơkă 100 thun mơ̆ Hră pơtrun jơnum ruah khua ping gah tal XIII pơtong rơđah: Tơhnal pơkă ƀơi anăp truh thun 2030 lĕ jơnum prong hơdor glăi tal 100 thun hrơi akŏ pơjing ping gah hăng jing lŏn ia pơđĭ kyar bruă măi mok tuh tia pơkra ming phrâo, rơnoh pơhrui glăi pơkă dưm dưm lu hloh. Thun 2045, hơdor glăi hrơi akŏ pơdong lŏn ia kơnuk kơna phrâo, jing lŏn ia mơnuih mơnam ngă pô bơkơnar pơđĭ kyar hơmâo rơnoh pơhrui glăi lu hloh. Kiăng dưi ngă djop tơhnal pơkă anai, khua pơ ala ơi Đỗ Tiến Sỹ, grup pơ ala ping gah Kơnuk kơna dêh čar rơkâo:

“Khom ngă tong ten hloh pơblih kơtang gah bruă kơsem min boh thâo ia rơgơi, pơblih tơlơi pơčeh phrâo hăng ba yua mrô gưl dêh čar hăng kiăng dưi ngă tui anun lĕ kah hăng tơlơi Khua git gai ping gah hơmâo lăi anun mơ̆ng jing jơlan hơdră ngă bruă djơ̆ tui Hră pơtrun jơnum ruah khua ping gah tal 14, đĭ kơtang hloh pơkă hăng jơnum hơdôm tal hlâo adih, pơčrâo rơđah pô ngă, jơlan hơdră ngă tui truh pơ pok pơhai ngă tui Hră pơtrun 14. Ƀing ta ƀuh rơđah lĕ boh yom phun pơđĭ kyar bruă kơsem min boh thâo ia rơgơi phrâo, pơblih tơlơi pơčeh phrâo hăng ba yua mrô dêh čar jing pran kơtang pơtrut bruă mă pơkra ming, sĭ mơdrô hăng pơjing rai gơnam sĭ mơdrô bơwih ƀong huă. Amăng rơnuk phrâo lĕ khom pơtrut pơđĭ kyar boh thâo ia rơgơi, pơblih tơlơi pơčeh phrâo, ba yua mrô gưl dêh čar”.

Tui hăng khua pơ ala ơi Trần Phước Sơn, grup mơ̆ng ƀôn prong Đà Nẵng, kiăng dưi ngă djơ̆ tơhnal pơkă bơwih ƀong huă truh thun 2030, lăng nao pơ anăp adih truh thun 2045 kiăng pơtong rơđah hơbô̆ bruă pơđĭ kyar phrâo, dăp glăi bruă mă, tơlơi bơwih ƀong huă, ba yua măi mok phrâo, lăng kơ bruă ba yua boh thâo ia rơgơi, pơblih pơčeh phrâo hăng ba yua mrô jing pran kơtang:

“Rơkâo brơi ngă rơđah hloh boh pia hăng hơbô̆ bruă pơkă rơnoh pơđĭ kyar phrâo. Anai lĕ hơbô̆ bruă pơđĭ kyar lu mơta, lir hơbit hăng rơnoh gơnam pơkra ming hăng blơi yua, kơnang kơ anŏ pơčeh phrâo, boh thâo ia rơgơi, tơlơi phiăn, mơnuih mă bruă thâo rơgơi hăng bơwih ƀong huă mrô. Dua dơ̆ng lĕ pơtong rơđah 3 tơmeh phun dăp glăi tơlơi bơwih ƀong huă, anun lĕ anom bruă, gah bruă mă tui hơdră ba yua măi mok phrâo, pơgang anŏ hơdjă mơtah mơda hăng yua mrô soh. Dăp glăi bruă mă, anih pơđĭ kyar tui rơnoh pơđĭ kyar, jơlan gah bơwih ƀong huă hăng bơwih ƀong huă amăng kual ia rơsĭ. Dăp glăi tơlơi phiăn pơkă kơ sang bruă mơdrô, mơnuih mă bruă kiăng pơđĭ boh tŭ yua, ba glăi rơnoh pơkă pơhno gơnam pơkra ming sĭ mơdrô”.

Ƀing khua mua pơ ala lăng yom, tal blung a jơlan hơdră pơphun bruă mă dưi čih pơthâo djop amăng Hră pơtrun. Tơlơi anun brơi ƀuh tơlơi kiăng ngă tui khut khăt ƀu kơnong dŏ glăi ƀơi jơlan hơdră đôč ôh, khom jing pran jua lir hơbit ngă hrŏm amăng abih bang mơnuih mơnam. Jơlan hơdră mă bruă ngă tui tơlơi kiăng pơđĭ kyar. Khua pơ ala ơi Phan Văn Mãi, grup mơ̆ng ping gah anom bruă khua pơ ala mơnuih ƀôn sang dêh čar rơkâo:

“Rơkâo dăp hơdră pơkra jơlan mă bruă pơđĭ kyar bơwih ƀong huă kơjăp hơđong, anŏ phun kơ dêh čar, amăng anun pơtum nao nao kơ dua boh kual bơwih ƀong huă phun kual gah Kơdư hăng Dơnung. Yua anŏ gêh găl, lŏn mơnai ƀơi dua boh kual anai dŏ prong. Lơ̆m tơlơi bơwih ƀong huă tui jơlan hơdră bơwih ƀong huă tui hơbô̆ pơkă kual, djơ̆ găl, kơjăp hơđng amra pơtrut lŏn ia đĭ kyar hloh”.

Lu tơlơi pơgôp hiăp hơmâo pơčrong sai tŭ ư hrŏm anăp nao akŏ pơdong lŏn ia mơnuih mơnam Việt Nam hiam mơak, tơpă hnơ̆ng, thâo rơgơi, rơnuk rơnua hăng pơđĭ kyar. Anŏ phun blung hlâo hloh lĕ, ngă kơjăp glăi tơlơi tơpă amăng bruă mă, pơblih hơdră ngă hră pơar, pơhlom hlâo hăng pơgăn tơlơi hưp ham ƀong kông ngăn, phăk phi, soh sat; akŏ pơjing khul mơnuih mă bruă tơpă sit nik, hur har, khin pơmin, khin ngă bruă, khin glăm ba amăng bruă mă kiăng kơ tơlơi phiăn dêh čar sit pơtrun khom nao hrŏm bruă mă djơ̆ pran jua ană plơi pla./.