Amăng 2 hrơi dong mơng lơ 24-25/8, anom hơduah ĕp bruă mă tač rơngiao, Ding jum bruă mă, tơhan rơka hăng mơnuih mơnam gum hrŏm hăng gơnong bruă mă, tơhan rơka hăng mơnuih mơnam tơring čar Kon Tum pơphun hrơi hơduah ĕp bruă mă ƀơi 2 boh tơring glông tơnap tap dưi tŭ mă hơdră djru 30a mơng Kơnuk kơna anun lĕ Tu Mơ Rông hăng Kon Plông. Hrơi hơduah ĕp bruă mă hơmâo črâo brơi bruă mă kơ rơbêh 600 čô mơnuih djuai ania Sêdang ƀơi 2 boh tơring glông anai.

Amăng 2 hrơi pơphun, hơmâo 42 boh anom bơwih ƀong sĭ mơdrô, hơdôm anom bruă kiăng ĕp mơnuih mă bruă hăng rơbêh 2.200 anih mă bruă amăng tơring čar, gah rơngiao tơring čar hăng nao mă bruă pơ tač rơngiao. Ƀing mơnuih mă bruă ƀơi 2 boh tơring glông Tu Mơ Rông hăng Kon Plông, tơring čar Kon Tum tơdơi kơ pel ĕp, hơmâo črâo ba amăng hrơi hơduah ĕp bruă mă amra nao tơl anom bruă hơduah ĕp bruă mă tơring čar Kon Tum kiăng pơlir hăng hơdôm anom bơwih ƀong sĭ mơdrô hăng ngă hră pơ-ar. Anai lĕ tal blung a, anom hơduah ĕp bruă mă tač rơngiao pơphun črâo brơi bruă mă ƀơi tơring čar Kon Tum.