Dua čô khua tŭ ư pơsit, hrơi blan rơgao, ngă hrŏm ling tơhan plah wah dua boh dêh čar hơmâo pok pơhai abih bang ha amăng plĕ, sit nik, djơ̆ tui tơlơi pơtrun mơ̆ng khua mua dua boh dêh čar. Dua bơnah hơmâo pơčrông sai na nao, lăi pơthâo hăng khua mua pơprong; ngă hrŏm wai lăng, pơgang guai, tơhan sơlup, tơhan ia rơsĭ; ngă hrŏm hyu tir, pơkơdong glăi ƀing ngă soh găn rơgao lu dêh čar, sĭ mơdrô dŏp, pleč ƀlor.

Lu hơbô̆ bruă ngă hrŏm sit nik hơmâo pok pơhai kah hăng: pơtruh giăng mah puih kơđông, plơi pla dua bơnah guai, hơdôm bruă djru tơlơi hơdip mơda bơwih ƀong kơ mơnuih ƀôn sang pơ guai dêh čar. Dua čô khua ding jum tŭ ư hơkrŭ kjăp tui tơlơi rô nao rai gum pơgôp; ngă giăng mah; pơbưp lu hloh, pơčrông sai bruă lu hloh; pơtrut tui tŭ yua bruă ngă hrŏm pơtô pơjuăt mơnuih mă bruă; ngă hrŏm kjăp, djru nao rai ƀơi hơdôm mông jơnum pơgang lŏn ia amăng kual hăng jar kmar. Dua bơnah ăt tŭ ư pơtrut ngă hrŏm klâo boh dêh čar Việt Nam - Lao - Kur, amăng anun hơmâo mông bưp rim thun plah wah klâo čô Khua ding jum ling tơhan hăng pơtŏp hrăm pơgăn tơlơi lông lăng rơnuk rơnua phrâo hơmâo kah hăng djru mơnuih bưp tơlơi truh, pơgang tơlơi truh lŏn adai ngă, klin kheng.