Pơphun amăng 2 hrơi (23-24/9), hrơi jơnum pơphun bơwih ƀong pơplih pơčeh phrâo tơring čar Dak Lak thun 2024 (Techfest Dak Lak 2024) hơmâo lu bruă mă anun lĕ: Pơdă prưng, lăi pơthâo hơdôm akŏ bruă, gơnam pơphun bơwih ƀong, gơnam OCOP, tuh tia pơkra ming ƀon lan, bơwih brơi tuai čuă ngui; sa, dua jơnum bơkơtuai kơ bruă pơphun bơwih ƀong pơplih pơčeh phrâo, pơphun bơwih ƀong mơtah, hơdră pơtrut pơphun bơwih ƀong amăng djop gơnong bruă, djop anih anom, djop khul grup, ƀing mơnuih…Anai lĕ bruă mă hơmâo pơphun rĭm thun, jing hrơi mông pơbưp nao rai mơng ƀing glăk pơphun bơwih ƀong, pơlir tuh pơ alin, ĕp anom bruă ngă hrŏm, pok prong bơwih ƀong sĭ mơdrô.

Amăng hơdôm hrơi jơnum pơphun bơwih ƀong pơplih pơčeh phrâo tơring čar Dak Lak thun 2024, gơnong bruă sĭ mơdrô hăng tuh tia pơkra ming tơring čar Dak Lak hơmâo pơphun Jơnum pơlir sĭ mơdrô, blơi pơhrui gơnam thun 2024. Jơnum anai anăp nao hơnong pơkă kiăng pơtrut pơsur, ngă lar hyu hăng pơtrut pran pơphun bơwih ƀong sĭ mơdrô amăng abih bang mơnuih hăng hơdôm bruă pơphun bơwih ƀong pơplih pơčeh phrâo, pơlir djop anom bruă, ƀing rơgơi kơhnâo, ƀing wai lăng, ƀing bơwih ƀong sĭ mơdrô kiăng gum djru, črâo ba pơđĭ kyar gơnam tam. Nao jơnum hrŏm, ơi Đường Văn Quân, Khua kông ti pơčruih ngăn pơkra gơnam bơbuă drơi jăn Cao Nguyên brơi thâo:

“Amăng jơlan hơdră jơnum tal ƀing gơmơi kiăng lăi pơthâo brơi hơdôm anom pơphun bơwih ƀong ƀudah hơdôm anom bruă glăk ba gơnam sĭ mơdrô, kiăng ƀing gơñu thâo bruă ba gơnam sĭ mơdrô hiưm pă ñu. Mơng tơlơi pơčeh  pơkra gơnam, anung amăng adung, ngă hră pơ-ar djơ̆ tơlơi phiăn kơ gơnam tam, lơm ƀing gơñu mut hrŏm ba sĭ mơdrô. Ƀing gơmơi hơmâo grup kiăng djru pơtô brơi soh sel”.

Ƀrô tal anai, ƀơi plơi prong Buôn Ma Thuột ăt pơphun Jơnum bơkơtuai pơtrut pơlir pơphun bơwih ƀong pơplih pơčeh phrâo tơring čar Dak Lak. Nao jơnum hrŏm, kơ-iăng nai tha prin, nai prin tha Lê Đức  Niêm, Kơ-iăng khua sang hră gưl prong Tây Nguyên brơi thâo, bruă pơlir pơphun bơwih ƀong pơplih pơčeh phrâo ƀơi Dak Lak glăk amăng gưl 2, anai lĕ gưl blung a đôč, aka ƀu pơgiong. Yua anun, kiăng tŏ tui pơgiong djop tơhnal gal, pơjing hơdôm tơhnal bơdjơ̆ nao prăk tuh pơ alin, pơtô pơjuăt…

“Blung hlâo lĕ kiăng pơhlôm djop mơta, hơmâo djop anih anom, sang hră gưl prong, anom bơwih ƀong sĭ mơdrô, anom bruă ba jơlan hlâo, hơdôm anom bruă, gơnong bruă, sit biă ñu, hơmâo tơlơi črâo ba mơng tơring čar, amăng anun hơmâo ƀing mơnuih abih pran jua kiăng pơtrut pơplih pơphun bơwih ƀong pơđĭ kyar. Dua dong lĕ kiăng dơlăm tui, hơdôm bruă kiăng sit nik ƀiă dong, djơ̆ hăng tơlơi gal, djru brơi hơdôm anom bơwih ƀong sĭ mơdrô pơđĭ kyar. Tơdah pơđĭ kyar bruă pơlir pơphun bơwih ƀong klă, anom bơwih ƀong sĭ mơdrô amra ppơđĭ kyar amăng plang pơlir hơbit”.

Amăng hơdôm hrơi jơnum pơphun bơwih ƀong pơplih pơčeh phrâo tơring čar Dak Lak thun 2024, hơdôm anih anom hơmâo pơdă prưng, lăi pơthâo giăm 150 anih pơdă gơnam pơphun bơwih ƀong sĭ mơdrô pơčeh phrâo, gơnam OCOP, tuh tia pơkra ming ƀon lan, gơnam bơwih brơi tuai čuă ngui mơng hơdôm anih anom, anom bơwih ƀong sĭ mơdrô amăng tơring čar.

Ơi Nguyễn Tuấn Hà, Kơ-iăng khua Jơnum min mơnuih ƀôn sang tơring čar Dak Lak brơi thâo, tơlơi truh kih mơng hrơi jơnum anai amra pơtrut pran pơphun bơwih ƀong amăng abih bang mơnuih ƀôn sang, čơđai sang hră. Hơmâo lu dong tơlơi pơmĭn pơčeh phrâo, pơjing plang pơlir hơbit pơphun bơwih ƀong pơplih pơčeh phrâo amăng tơring čar jai hrơi hơđong kjăp, sit nik hăng ba glăi tŭ yua.

“Hơdôm mông jơnum bơkơtuai hơmâo mut dơlăm nao hơdôm bruă, anun lĕ bơkơtuai bơdjơ̆ nao pơčeh phrâo, sang hră gưl prong Tây Nguyên hơmâo đing nao pơplih pơčeh phrâo amăng čơđai sang hră gưl prong, bơ gơnong kơčăo bruă hăng tuh pơ alin pơplih pơčeh phrâo amăng bơwih ƀong sĭ mơdrô, anom bơwih ƀong hrŏm. Lơm ngă dơlăm tui anun amra ba glăi boh tŭ yua hloh. Hơdôm gơnam mơng bruă pơphun bơwih ƀong ăt jai hrơi klă tui, hiam hơdjă hăng đĭ nua, ngă lar hyu amăng abih bang mơnuih”.

Ta dưi lăi, hơdôm bruă djru pơphun bơwih ƀong amăng tơring čar ba glăi tơlơi tŭ yua prong, pơgôp pơjing khul pơlir hơbit pơphun bơwih ƀong amăng tơring čar Dak Lak pơđĭ kyar dơlăm tui, lar hyu pran pơphun bơwih ƀong amăng abih bang mơnuih ƀôn sang. /.