Ƀrô hrơi ngui Têt Bính Ngọ 2026 (mơ̆ng lơ 27 blan Chạp truh hrơi tal 6 Têt), tơring čar Lâm Đồng hơmâo čơkă tuai lu biă. Tui hăng Jơnum min mơnuih ƀôn sang tơring čar, mrô tuai nao ngui, pơdơi pơdă năng ai 925.000 wơ̆t, đĭ 32% pơhmu hăng thun Têt Ất Tỵ 2025; amăng anun tuai mơ̆ng čar rơngiao hơmâo 62.000 wơ̆t. Prăk pơhrui hơmâo năng ai 1.850 klai prăk. Tuai nao ngui lu mơ̆ng hrơi tal 2 truh tal 4 blan ngui Têt; lu sang jưh tuai ƀơi Đà Lạt, Phan Thiết, Mũi Né tuai nao bă mơtăm. Mrô tuai nao đih pơdơi amăng tơring čar mơ̆ng 80-85%, brơi ƀuh bruă pơhưč tuai hơmâo rŭ glăi yơh, gêh găl biă kơ rơnoh pơkă kiăng đĭ mơ̆ng bruă tuai hyu ngui thun 2026.

Bruă bơwih brơi tuai čuă ngui ƀơi Khánh Hòa akŏ thun phrâo hơmâo lu tơlơi gal lơm mrô tuai hyu čuă ngui lu biă mă, lu sang jưh tuai hơmâo mơnuih dŏ, abih tih prăk pơhrui bơyan tê̆t Bính Ngọ 2026 giăm 2.200 klai prăk, đĭ rơbêh 62% pơhmu tui tơđar. Dong mơng lơ 29 blan 12 truh lơ 5 tê̆t, tơdron rơdêh por jar kmar Cam Ranh hơmâo giăm 800 tal por hyu hăng rơbêh 140 rơbâo wŏt tuai; hrŏm hăng anun lĕ mrô tuai nao čuă ngui rôk jơlan glông dong. Tuai hyu čuă ngui bơyan bơnga ƀuh dik dak ƀơi hơdôm anih čuă ngui. Đơ đam tơring čar čơkă giăm 320 rơbâo wŏt tuai dŏ glăi, đĭ rơbêh 12%; lơm anun tuai mơng tač rơngiao giăm 120 rơbâo wŏt, đĭ rơbêh 23%. Anai lĕ atur gêh gal kiăng ƀon lan tŏ tui pơđĭ kyar tuai čuă ngui, anăp nao hơnong pơkă pơhrui glăi 77.000 klai prăk amăng thun 2026. 

Tui hăng Gơnong bruă gru grua, bơrơguăt drơi jăn hăng tuai čuă ngui Dak Lăk, amăng 6 hrơi (mơ̆ng lơ 17 truh 22/2), tơring čar čơkă năng ai 395.000 wơ̆t, prăk hơmâo năng ai 457 klai prăk. Pơhmu hăng Têt Ất Tỵ, tuai đĭ 33% hăng prăk pơhrui đĭ 25% Hơdôm anih tuai čuă ngui pơ glai klo, čroh ia hăng hyu ngui amăng plơi pla kual Yŭ jing anih nao ngui pơhưč biă, lơ̆m anun gah Ngŏ dik dak hyu lăng ia rơsĭ hăng hyu lăng anih hyơhiam. Lu bruă ngui sem lăng gru grua, bơrơguăt drơi jăn akŏ thun phrâo hơmâo pơphun kah hăng ngui tuah song grup đah rơkơi să Krông Ana, tuah song pơ dơnao ia Suối Bùn (să Sơn Hòa) hăng tơlơi ngui ngor him či pơphun pơ anăp dong. Bruă anai brơi ƀuh rơđah čuă ngui hyu ngui jai hrơi ngă pơhưč mơnuih mơnam, pơlir hăng gru grua hăng tơlơi dŏ dong ƀong huă mơ̆ng plơi pla.