Tơlơi pơhing hơjan hlim ia ling dăo ƀơi kual gah ngŏ tơring čar Dak Lak hlăk pơblih tơnap tap biă mă, hŭi rơhyưt kơtang lơ̆m hơjan hlim sui hrơi amăng kual prong đơr hơr, amăng anun lu sang măi drai apui lơtrik khom pok pơhai ia prong biă mă hŭi pơčah bơnư̆ pơkong laih anun ia rô ngă lip gah kual ƀơi tơkai. Nao ĕp lăng bruă bong glăi tơlơi truh ia ling dăo gah kơdư tơring čar lơ 19/11, Kơ-iăng khua dêh čar ơi Hồ Quốc Dũng pơtrun hiăp kơ djop anom bruă ling tơhan tañ pơđuăi hĭ mơnuih ƀôn sang hlâo kơ adai mơmŏt, pơkă tơhnal bruă khom ngă djru pơklaih mơnuih ƀôn sang jing bruă yom hlâo hloh. Ia ling dăo ƀơi ia krông Apa hăng lu krông pơkŏn gah kual kơdư tơring čar Dak Lak lêng kơ đĭ kơtang hloh kơ tal ia lip thun 1993. Jơlan mrô sa 1A hăng jơlan prong dêh čar ta arăt pơkŏn tơ̆i đưn ƀu thâo truh nao rai, ngă tơnap prong biă mă kơ bruă hyu pơklaih mơnuih ƀôn sang mơ̆ng anih hŭi rơhyưt. Hơjan ăt dŏ sui đôč amăng hơdôm hrơi dơ̆ng, sit mơ̆n ia amăng djop krông amra đĭ kơtang hloh ƀơi djop să ter hang ia krông Tam Giang, Sông Cái, krông Apa hăng krông Bàn Thạch, pơhŭi kơtang kơ tơlơi rơnuk rơnua hơdôm rơbâo sang anŏ mơnuih ƀôn sang. Ƀing tơhan djop anom bruă, hmư̆ tơlơi pơtrun hiăp, ngă tui lu hơdră pơhlom tơlơi rơnuk rơnua kơ mơnuih ƀôn sang hăng kông ngăn.

Mơmŏt lơ 19/11, Khánh Hòa tŏ tui ƀuh hơjan prong. Lu kual ia dăo dơlăm, guang dar; ia prong ƀơi djop ară ia krông, amra ƀuh lŏn tơhroh. Ƀơi anăp kơ tơlơi glêh tơnap, Khul Ping gah Khánh Hòa hơmâo tơlơi lăi pơthâo ječ, rơkâo hơdôm anom bruă đing nao hloh kơ bruă pơhlôm hlâo, pơgang rơnuk rơnua brơi mơnuih ƀôn sang. Tui lăi pơthâo, mơguah lơ 20/11, hơjan ăt dŏ prong, ia rô trun dŏ kơtang ngă dăo lu anih. Amăng 48 mông pơ anăp, đơ đam tơring čar amra ƀuh hơjan prong mơn; ia prong amra ƀơi hơdôm ară ia krông Cái Nha Trang, ia krông Cái Phan Rang, ia krông Dinh (Ninh Hòa)…. Khul git gai Ping gah rơkâo Khul git gai wai pơgang mơnuih ƀôn sang tơring čar hăng djop khul ling tơhan ba nao gơnam măi mok, ječ ameč ba đuăi mơnuih mơng kual hŭi rơhyưt.

Tlam mơmŏt lơ 19/11, Gia Lai bơbeč djơ̆ kơtang biă mă tal hơjan ia ling dăo aka ƀu hơmâo djơ̆ prong kah hăng ră anai, kơnong amăng sa hrơi mlam đôč čih pioh hơmâo 3 čô mơnuih djai; rơbêh 10.400 boh sang anŏ ia dăo hăng ƀu thâo truh nao rai. Ƀơi anăp kơ tơlơi pơhing ječ ameč, Khua Jơnum min mơnuih ƀôn sang tơring čar Gia Lai, ơi Phạm Anh Tuấn pơtrun hiăp kông an, ling tơhan hăng khua mua gong gai kơnuk kơna plơi pla khom pơdŭ đuăi mơnuih ƀôn sang tañ. Tơhan kông an hơmâo pơđuăi laih 3000 čô mơnuih ƀôn sang, djru brơi 184 čô mơnuih mơ̆ng anih ia dăo kơtang. Ƀơi lu să kah hăng Ia Tul, Ia Apa, Pơtŏ, Ia Rơsai, Uar….bing tơhan kơnuk kơna khom đĭ kanô, ba hrĕ akă pông kơsu pioh djru mơnuih ƀôn sang luai ia găn nao pơ anih rơnuk rơnua hloh, đuăi mơ̆ng anih ia guang dar hĭ. Ter hang ia krông Apa, hơdôm rơtuh boh sang anŏ mơnuih ƀôn sang djop plơi pla, hơmâo pơdŭ đuăi nao dŏ pơ anih rơnuk rơnua laih.

Ăt amăng mlam lơ 19/11, ƀơi jơlan čun čue Mimosa, gah phường Xuân Hương-Đà Lạt, tơring čar Lâm Đồng hơmâo anih lŏn čơđang dlưh kơtang. Abih atur jơlan anih čơđang hlong tơ̆i hak prong biă mă, lơ̆m mông ječ ameč anun, ƀing tơhan kông an hyu pơklaih hmar tơring čar Lâm Đồng, mă bruă amăng mlam mơmŏt, jơlan rô nao rai hŭi rơhyưt kơtang, kah hăng bơkơtưn hăng mông mơnit kiăng nao djru pơklaih brơi mơnuih ƀôn sang hmao kru, pơdŭ 12 čô mơnuih ƀôn sang tơbiă đuăi mơ̆ng anih hŭi rơhyưt.