Dŏng lăng glông ia rô juar, ơi Rơlan Kem ƀơi să Čư̆ Rčăm, tơring glông Krông Pa, suă pran hơnong rơngôt lăi: 1 ektar lŏn mơng sang anô̆ hrom hăng năng ai ñu 100 ektar lŏn mơng neh wa ƀôn H’Lang ia Pa kor đuăi.

 “Hlâo adih, 1 ektar pơhrui hmâo mơng 5 truh 6 tơn. Lŏn ră anai tơhroh đuăi abih laih, ia kor đuăi abih. Hơdôm bôh sang ƀơi anai pŭ đuăi laih, hnĭ ƀu thâo đuăi lĕ, ƀơi anai lŏn ƀiă tơhlom laih. Hơdôm mơnuih ƀơi anai đuăi abih laih”.

Mơnuih ƀôn sang ƀôn H’Lang prăp lui ba đuăi pơ̆ anih phrâo bĕ lŏn tơhlom

Ơi Hà Văn Đường, Khua Jơnum min mơnuih ƀôn sang să Čư̆ Rčăm brơi thâo, rơngiao kơ 100 ektar lŏn ngă đang hmua mơng neh wa H’Lang ia kor đuăi abih bang, tơlơi lŏn tơhlom ƀơi ia Pa ăt glăk pơhuĭ truh tơlơi hơdip rơbêh kơ 100 bôh sang anô̆ ƀơi anai. Tơdrông toa Lệ Bắc, tô 2 bôh să Čư̆ Rčam hăng Ia Rsươm lŏn tơhlom giăm truh ƀơi tơkai tơdrông toa 2 bơnah hang ia.

Kiăng pơhlôm klă kơ mơnuih ƀôn sang, rơnuč thun 2020, Jơnum min mơnuih ƀôn sang tơring glông Krông Pa hmâo pơsit laih rơwang bruă Tuh pơplai pơdŏng ring bruă dưm dăp, hơđong anih mơnuih ƀôn sang ƀơi ƀôn H’Lang, prong giăm truh 7 ektar pioh ba đuăi rơbêh kơ 102 bôh sang anô̆ djuai ania Jarai amăng kual amra hmâo lŏn tơhlom. Jơnum min mơnuih ƀôn sang să Čư̆ Rčăm ăt hmâo rơkâo đĭ laih kơ tơring glông ĕp jơlan pha brơi lŏn kơ neh wa djuaia nia ƀiă hmâo lŏn tơhlom abih:

 “Ră anai, ñu lĕ glông ia rô phun mơng ia Pa anun ñu phă kual anun. Gah anai, ñu phă mut amăng kual pơsat hăng kual mơnuih ƀôn sang dô̆ anun khom ngă tui rơwang bruă ba đuăi mơnuih ƀôn sang. Ñu bơdjơ̆ nao prong biă, anun lĕ rơngiă pưh tơngan kual lŏn anun mơtăm hơdôm bôh sang dô̆ giăm hang ia krông. Tơlơi tơnap lĕ lŏn ngă đang hmua mơng să Čư̆ Rčăm ƀu lu, ră anai khom pơplih pơkra lŏn hrŏ trun lŏn ngă đang hmua kơ neh wa”.

Rơbêh 100 ektar lŏn ngă đang hmua mơnuih ƀôn sang ƀôn H’Lang ia kor đuăi amăng ia Pa

Ơi Hồ Văn Thảo, Khua Jơnum min mơnuih ƀôn sang tơring glông Krông Pa brơi thâo, tơring glông hmâo 13 anih lŏn tơhlom rôk tui glông ataih năng ai ñu 45 km anih ia Pa rô găn nao 8 bôh să, tơring kual. Črăn lŏn tơhlom kơtang hloh truh ƀơi 2 bôh să Ia Rsai hăng Čư̆ Rčăm. Hơdôm hrơi rơgao, amăng tơlơi prăk mă yua ƀiă mơng tơring glông ƀun rin, tơring glông phrâo đing nao pơhlôm tơlơi hơdip kơ mơnuih ƀôn sang hăng bruă pok pơhai hơdôm rơwang bruă ba đuăi mơnuih ƀôn sang mơng kual lŏn tơhlom. Kiăo tui anun, rơwang 2012-2014, tơring glông pok pơhai rơwang bruă pơpha rơbêh kơ 870 čô mơnuih ƀôn sang ƀơi 4 bôh să Ia Rsai. Thun 2019, tơring glông tô̆ tui dong rơwang bruă pơpha anih dô̆ ječ brơi kơ 31 bôh sang anô̆, 166 čô mơnuih ƀơi 2 bôh să Ia Rsươm hăng să Ia Rsai. Mơng thun 2020 truh ră anai, ngă tui dong rơwang bruă ba đuăi rơbêh kơ 102 ƀôh sang anô̆ mơnuih ƀôn sang ƀôn H’Lang. Truh ră anai tơlơi lŏn tơhlom rôk tui glông ia Pa ăt glăk dô̆ mơn rim hrơi mơ̆ akă hmâo jơlan pơsir hơpă pioh ngă hơdư̆ hĭ ôh. Ơi Hồ Văn Thảo, brơi thâo.

 “Jăng jai lĕ pơhlôm tơlơi hơdip, kông ngăn mơnuih ƀôn sang, kông ngăn kơnuk kơna lĕ đing nao blung a. Prăk pioh kơ bơnư̆ ƀôn H’Lang lĕ pioh ba đuăi tañ, bơ̆ bơnư̆ hơdôm rơtuh met lĕ abih bang ha rơtuh klai. Jơnum min mơnuih ƀôn sang tơring glông hmâo yap laih pioh rơkâo Jơnum min mơnuih ƀôn sang tơring čar, tơring čar ba tơbiă kơ Ding jum đang hmua hăng pơđĭ kyar ƀôn lan”.

Tơlơi hơdip mơnuih ƀôn sang pơhuĭ truh, lŏn ngă đang hmua rơngiă, samơ̆ akă hmâo jơlan gah pioh pơgăn ôh

Gong gai ăt kah hăng mơnuih ƀôn sang Krông Pa, Gialai, čang rơmang hơdôm gưl gơnong bruă mơng dêh čar truh plơi pla tañ hmâo hơdôm jơlan gah phun pioh pơsir pơđut tơlơi lŏn tơhlom ia Pa, pơhlôm tơlơi hơdip kơ mơnuih ƀôn sang./.