Mơmŏt tom brơi (4/11), ƀơi tơdron lăk đang bơnga plơi prong Đà Lạt, Khul hlăk ai rơnuk Hồ Chí Mih gum hrŏm hăng Ping gah tơring čar, Jơnum min mơnuih ƀon sang tơring čar Lâm Đồng pơphun jao pri Lương Định Của tal 17 hăng jao pri tal pơplông akŏ pơphun bruă mă kơ hlăk ai thun 2022. Găn rơgao 17 thun pơphun, pri Lương Định Của hơmâo jao brơi laih 2.050 “mơnuih ngă hmua rơgơi”. Hăng thun anai, pri hơmâo jao brơi 32 čô hlăk ai ba gru hăng pran hrưn đĭ ngă pơdrông asah hăng hơmâo lu bruă mă truh kih amăng đơ đam dêh čar.

Amăng ƀing hlăk ai mă pri Lương Định Củathun 2022, lu hlăk ai dưi pơhrui rơbêh 30 klai prăk hăng đa hơmâo mơnuih pơhrui 706 klai prăk, ba glăi kmlai hơdôm klai prăk rĭm thun. Sit biă ñu, lu hlăk ai djuai ania ƀiă amăng tơring čar dŏ bưp tơnap tap samơ̆ hăng pran gir run hrưn đĭ pơdrông asah, jing ƀing hlăk ai hơmâo kông ngă lu hloh. Anai lĕ ƀing hlăk ai gir run amăng hơdôm bruă pơplông bơwih ƀong huă sĭ mơdrô rơgơi, hlăk ai gum tơngan hrŏm man pơdong plơi pla phrâo ƀơi ƀon lan.