Hơdôm tơlơi čih ăt lăi pơthâo pran jua pơgôp prong mơ̆ng Khua git gai ping gah ơi Nguyễn Phú Trọng amăng bruă mă man pơdong lŏn ia, pơgăn tơlơi soh sat ƀong kông ngăn hăng jơlan hơdră pơtom hiăp djơ̆ lăp kiăng pơđĭ kơnuih hiam mơ̆ng Việt Nam hăng jar kmar. Hră pơhing phrâo dêh čar Lao, hră pơhing phrâo Vientiane, hrŏm hăng lu hră pơhing pơprong pơkŏn dêh čar Lao lêng kơ čih, pơdah rup Grup khua mua ping gah, kơnuk kơna Lao, yua Khua git gai ping gah, Khua mir sir ơi Thongloun Sisulith ba jơlan hlâo rai jôk ơi Nguyễn Phú Trọng. Tơlơi pơhing čih kơ mông ngă yang jôk mơyut khua git gai ping gah ơi Nguyễn Phú Trọng, hră pơhing phrâo Khmer dêh čar Kur ( Khmer Times) lăi pơtong, Khua git gai ping gah ơi Nguyễn Phú Trọng tŭ mă lu tơlơi pơpŭ bơni hiam mơ̆ng mơnuih ƀôn sang Việt Nam hăng mơnuih ƀôn sang jar kmar yua hơdôm tơlơi ƀuăn mơ̆ng ñu kiăo tui tong ten jơlan hơdră pơđĭ kyar lŏn ia hăng tơlơi gơgrong hrŏm djru pơsir bruă amăng jar kmar.

Sputnik dêh čar Nga ăt čih, lăi pơtong, Khua git gai ping gah ơi Nguyễn Phú Trọng pô dưm atur kơjăp kơ bruă ngă giăng mah Việt-Nga. Mơ̆ng dêh čar Cuba tơlơi hơdor tơngia hiam klă hăng tơlơi pơpŭ yôm hơmâo mơ-it kơ Khua git gai ping gah dêh čar ta ơi Nguyễn Phú Trọng, hăng lu mơta tơlơi čih pơdah amăng bơnah blung sa pok sa hră pơhing phrâo Granma dêh čar Cuba. Tơlơi čih anun lăi pơthâo tong ten tơlơi pơgôp mơ̆ng pran jua ơi Nguyễn Phú Trọng amăng bruă pơđĭ kyar lŏn ia hăng mơnuih ƀôn sang Việt Nam, ăt lăi, tơlơi ngă giăng mah gum pơgôp, adơi ayong jai hrơi kjăp tui plah wah mơnuih ƀôn sang, ping gah Cộng sản laih anun kơnuk kơna dua bơnah. Hră pơhing phrâo Reuters dêh čar Angle ăt pôr tơlơi pơhing tum teč kơ mông ngă yang jôk atâo ơi Nguyễn Phú Trọng Khua git gai ping gah dêh čar ta, hơmâo lu khul grup pơtom hiăp, khua pơ ala mơ̆ng anom bruă gơyut gơyâo jar kmar.