Ƀơi anih pơdong plơi phrâo prong 5ha či să Hồng Sơn, tơring čar Lâm Đồng, hơdôm pluh čô kông ñơn hrŏm hăng lu rơdêh, măi mok glăk man pơdong jơlan nao rai amăng plơi. Ơi Đặng Hữu Linh, Khua ring bruă brơi thâo, anom bruă gơñu glăk gir ngă hmar, truh ră anai hơmâo ngă giong 50% mrô bruă laih: “Ƀơi anih mă bruă leng kơ hơmâo rơbêh 25 čô kông ñơn soh dŏ mă bruă, wơ̆t hăng pô mơgăt rơdêh. Ră anai adơi ayong pơƀut ngă bruă kiăng tañ ƀiă, đah mơ̆ng dưi ngă giong ring bruă amăng blan 9 thun 2026 anai”.

Ƀơi lu ring bruă man pơdong plơi phrâo či să Lương Sơn, tơring čar Lâm Đồng, ƀing kông ñơn hrŏm hăng lu boh rơdêh glăk dŏ glit atur jơlan. Plơi phrâo ƀơi să Lương Sơn hơmâo man pơdong ƀơi anih prong rơbêh 4ha, tơdơi kơ pơkra giong amra brơi 100 boh sang anŏ dŏ pơ anai. Pơ anai ăt hơmâo anih sĭ mơdrô sang čơ prong. Ơi Phạm Huy Hoàng, Khua ring bruă brơi thâo, hăng tơlơi ngă bruă tui anai, him lăng amra dưi pơkra giong amăng krah blan 8 pơ anăp: “Rim hrơi ƀơi anih mă bruă hơmâo 8 khul man pơkra, sa khul mơ̆ng 10-12 čô kông ñơn. Bruă pơhlom rơnuk rơnua mă bruă, hơdjă agaih anih mă bruă hơmâo ngă djơ̆ hăng tơlơi pơtrun mơ̆ng tơring čar. Pơhmutu, hrĕ apui hơmâo dưm klă, rơnuk rơnua, ƀu dưi ngă lê̆ trun ča čot ôh. Anih pơpă thơ lŏn tơdu, dlut, jing dăng hrĕ pơhŭi hlâo, kiăng pơhlom brơi neh met wa hăng adơi ayong nao rai”.

Kiăng bơwih brơi bruă pơkra jơlan rơdêh treng đuăi hmar, tơring čar Lâm Đồng hơmâo pơklaih ala lŏn prong rơbêh 1.000ha. Tơring čar ječ ameč man pơdong 8 boh plơi phrâo kơ giăm 1000 boh sang anŏ đuăi hĭ mơ̆ng plơi hơđăp pioh či pơkra jơlan. Ơi Đặng Tuấn Anh, Khul wai lăng bruă man pơdong mrô 2 tơring čar Lâm Đồng brơi thâo, ră anai abih bang lŏn tơnah hơmâo jao glăi kiăng hơdôm anom bruă man pơdong 8 boh plơi phrâo. Laih dong hơdôm tơlơi gun amăng bruă man pơdong ăt hơmâo pơklaih laih đah mơ̆ng dưi man pơkra tañ: “Hơdôm luh mă pơtâo čuah ƀơi tơring čar Bình Thuận hơđăp, biă ñu lĕ kual gah Dơnung hơmâo lu luh abih laih hră brơi mă bruă. Pô tuh pơ alin ngă hrŏm hăng Gơnong bruă ngă hmua hăng Ayuh hyiăng laih anun hơdôm anom bruă bơdjơ̆ nao ĕp hơdră pơsir hĭ anŏ tơnap. Ră anai, hơdôm tơlơi tơnap anun hơmâo pơsir laih, pô gơgrong man pơdong ăt pơtrut ngă tañ pơhrua glăi hrơi blan ngă kaih hlâo kơ anun”./.