Amai Trần Thị Bình, ƀơi să guai dêh čar Ia Dom, tơring glông Đức Cơ, tơring čar Gia Lai dưi ruah mut mă bruă ƀơi đang kơ su Grŭp 2 Sang bruă 72, Binh đoàn 15 hmâo rơbêh pluh thun hăng anai. Ñu brơi thâo, hăng mrô prăk pơhrui glăi hơđong rim blan rơbêh kơ 7 klăk prăk, tơdơi kơ lu thun, sang anô̆ ñu hmâo blơi dong đang hmua, pioh ngă đang hmua tơdơi kơ mông mă bruă, mơ̆ng anun mơ̆ hmâo gơnam ƀong huă, gơnam pioh lui, ană bă hmâo tơlơi gal hrăm hră. Yua anun, ñu thâo bruă mă mơ̆ng mnuih mă bruă ƀơi anom bơwih ƀong, pơgang lŏn ia:

 “Hăng sa čô mơnuih mă bruă mơ̆ng anom ƀơi kual guai dêh čar, ƀu hmâo hlơi ôh mut amăng đang kyâo, ƀing gơmơi amra lăi pơthâo kơ anom hăng khul tơhan plơi, kiăng pơhlôm glông bruă kơ ƀing gơmơi ngă đang hmua hăng wai lăng guai dêh čar”.

Bơ̆ ƀơi tơring glông Čư̆ Prông, tơring čar Gia Lai, kơnang kơ ruah mut mă bruă kơ grŭp mrô 5, Trung đoàn 710 mơ̆, tơlơi hơdip mơda sang anô̆ ayong Kpuih Kớt hmâo pơplih laih abih bang. Ñu brơi thâo, rơkơi bơnai phrâo trun sang pha, lŏn ngă đang hmua ƀiă, ƀu klă hiam dong, anun tơlơi hơdip mơda tơnap tap biă. Dong mơ̆ng akô̆ thun 2022, wot 2 rơkơi bơnai ayong Kớt dưi ruah mut mă bruă kơ su, tơlơi hơdip mơda sang anô̆ jai hrơi jai hơđong tui:

 “Ră anai dua rơkơi bơnai ăt đĭ đăi mơn ƀiă. Tal blung a, lơm mut mă bruă, anom hmâo ngă gal brơi kơ 2 rơkơi bơnai kâo. Ră anai sang anô̆ hmâo prăk pơhrui glăi hơđong, duam rua lĕ hmâo ơi ia jrao ling tơhan. Pơ̆ anăp anai, dua rơkơi bơnai kâo gir run ngă klă hloh, hrăm tui tơlơi găn rơgao mơ̆ng mơnuih mut mă bruă hlâo, thâo bruă, kiăng hmâo dong prăk pơhrui glăi".

Rôk tui 3 bôh să guai dêh čar Ia Pnôn, Ia Nan, Ia Dom, sa črăn să Ia Kla hăng tơring kual Čư̆ Ty (tơring glông Đức Cơ), đang kơ su mơ̆ng Sang bruă bơwih ƀong mơnuih ƀôn sang sa ding kơna 72, Binh đoàn 15 glăk pơkĕ hrŏm 15 anih anom dô̆ mơnuih ƀôn sang, plơi pla tơring čar Gia Lai. Bơnah gah kơdih guai dêh čar, sang bruă ăt hmâo mơn hơdôm bôh anom pla kơ su ƀơi 7 bôh să gah 2 bôh tơring glông Oyadav hăng Bo Ko (tơring čar Ratanakiri, dêh čar Kur). Hrŏm hăng bruă pơplih phrâo, pơđĭ tui bôh tơhnal ngă đang hmua, anom pok pơhai lu jơlan hơdră hơđong tơlơi hơdip mơda mơnuih mơnam, pel ĕp tơlơi ruă, pha brơi đôč ia jrao, pơkĕ hrŏm sang anô̆ mơnuih djuai ania Yuan hăng djuai ania ƀiă gum hrŏm djru tơdruă pơđĭ kyar bơwih ƀong. Thiếu tá Phan Tiến Toàn – Kơ-iăng Khua Sang bruă 72, Binh đoàn 15 brơi thâo:

 “Hăng anom pơdŏng ƀơi 3 bôh să guai dêh čar, rim blan, anom pơkiăo nao khul tơhan gum hrŏm wai lăng rơnuk rơnua bruă kơđi čar, hơđong plơi pla ƀơi să; ngă klă bruă wai lăng gơnam tam; hrŏm hăng anun gum hrŏm hăng hơdôm khul pel ĕp mơnuih dô̆ jăng jai, rơkut jăng jai. Rim blan khul pơgang mă pô mơ̆ng anom gum hrŏm pơgang jơlan guai dêh čar, pŏng gong guai dêh čar. Hơdôm thun rơgao, anom dưi hmâo gưl ping gah, gong gai să pơsit yôm biă”.

Hăng jơlan gah “Binh đoàn pơkĕ hrŏm hăng tơring čar, tơring glông; sang bruă pơkĕ hrŏm hăng tơring glông, să; grŭp ngă đang hmua pơkĕ hrŏm hăng plơi pla; sang anô̆ mơnuih mă bruă gah djuai ania Yuan pơkĕ hrŏm hăng neh wa djuai ania ƀiă”, ră anai Binh đoàn 15 glăk ngă tui bruă bơwih ƀong pơkĕ hrŏm hăng pơgang dêh čar rôk tui glông guai dêh čar ataih rơbêh kơ 250 km nao gah Kơdư Dap Kơdư, giăm hăng dua bôh dêh čar Lao hăng Kur. Hơdôm thun rơgao, hơdôm bôh anom đing nao biă pơtô bruă mă, pơtô glăi bôh thâo rông hlô, tơjŭ pla, djru pơjeh pla, prăk yua bơwih ƀong... djru mơnuih ƀôn sang pơđĭ kyar bơwih ƀong sang anô̆. Mơ̆ng anun, lu sang anô̆ mơnuih djuai ania ƀiă tơtlaih mơ̆ng ƀun rin, hrưn đĭ ngă pơdrŏng; djru hrŏm gong gai să pơdŏng plơi pla phrâo ƀơi kual guai dêh čar.

Thiếu tướng Hoàng Văn Sỹ, Kơ-iăng Khua git gai Ping gah, Khua pơtrun bruă Bình đoàn 15 brơi thâo, Binh đoàn ră anai hmâo rơbêh kơ 15.000 čô mơnuih mă bruă, lu ñu lĕ djuai ania ƀiă. Thun 2022, prăk pơhrui glăi hơnong ñu mơ̆ng mơnuih mă bruă hmâo 8 klăk prăk sa blan. Tơlơi hơdip mơda mơ̆ng mơnuih ƀôn sang, mơnuih mă bruă ƀơi kual guai dêh čar pơđĭ kyar, bruă bơwih ƀong – pơgang lŏn ia jai hrơi jai kơjăp tui:

 “Pran jua gum hrŏm hơbit kơplah wah djop djuai ania, bơkơtuai bôh thâo phrâo amăng plơi pla jai hrơi đĭ tui; pran jua gum hrŏm kơplah wah mơnuih ƀôn sang hăng mơnuih apăn bruă, mơnuih mă bruă mơ̆ng Binh đoàn jê̆ giăm hăng kơjăp. Biă ñu dong lĕ mơnuih ƀôn sang hmâo tơlơi thâo hloh amăng tơlơi pơgang guai dêh čar, hmao thâo hơdôm tơlơi hling hlang, lăi pơhing hmao tlôn mơ̆ng anun ƀing gơmơi hmâo gum hrŏm hăng să hăng gưl dlông, hmao pơsir hơdôm tơlơi tơnap tap”.

Hăng hơdôm hơdră pơtrun djơ̆, hơdră bruă lăp djơ̆ hăng pran jua mơnuih ƀôn sang, hơdôm blah glai kơ su hmâo djru pơjing guai dêh čar mơtah kơjăp rôk tui guai dêh čar gah Kơdư kual Dap Kơdư./.