Hăng sa amăng hơdôm mơnuih ping gah hmâo mă hră pơkrem prăk, ơi Trần Thanh Tâm, gah Grŭp Ping gah phường Bình Tân, plơi prong Buôn Hồ brơi thâo: rơgao hăng anai 6 thun ñu hmâo tơlơi truh ƀơi jơlan nao rai, 2 thun blung a khom đih sa anih. Truh kơ thâo rơbat nao rai ñu ăt ƀu ai buai mơn, djop mơta bruă rô hyu kơnang kơ ană bơnai. Tơlơi pơsur, gum djru mơ̆ng gơnam tam truh pran jua ƀing gop amăng grŭp ping gah hăng neh wa iao gah lĕ pran pơtrut prong biă djru rơkơi bơnai ñu hmâo dong pran gơgrong pioh hrưn đĭ mơ̆ng tơlơi ruă nuă, yak rơgao tơlơi tơnap amăng tơlơi hơdip mơda:

 “Lom hmâo tơlơi truh ƀơi jơlan nao rai truh ră anai kâo ăt dưi hmâo gong gai ƀơi anai lăng ba mơn, ƀudah nao pơsur pran jua kiăng hrưn đĭ yak rơgao tơlơi ruă nuă, drơi pô tơdu, ƀu dưi ngă hơget kơnong kơ kơnang kơ ană bơnai”.

Ăt mơ̆ng tơlơi truh anun hăng dưi hmâo mă hră pơkrem prăk Búa Liềm Vàng, ping gah Y Mơi Ktla, Grŭp Ping gah ƀuôn Dlung 1B, phường Thống Nhất, plơi prong Buôn Hồ, brơi thâo, sang anô̆ gah sang anô̆ ƀun rin, kơnong kơ hmâo 4 ar lŏn ngă đang hmua. Hmâo mă hră prăk djru 5 klăk prăk, sang anô̆ ñu hmâo tuh pơplai bơwih brơi kơ phun pla hăng čang rơmang amra pơphun mrô gơnam pơhrui glăi kơ sang anô̆:

 “Bơni kơ Ping gah phường pha brơi hră pơkrem prăk kiăng hmâo dong prăk mă yua kơ sang anô̆. Hră pơkrem prăk anun hmâo ngăn rơnoh pioh blơi kơmok bơwih brơi kơ phun kơphê hăng blơi pơjeh phun pla hăng blơi ia jrao gun pơjrao tơlơi ruă kơ drơi pô”.

Tui hăng anun, hăng mrô prăk dưi gum djru, ping gah H’ Môi Buôn Yă, gah grŭp ping gah buôn Dlung 1A, phường Thống Nhất hmâo pơkrem dong pioh blơi sa drơi rơmô ba glăi rông:

 “Phrâo tom adih anai kâo dưi hmâo mă hră pơkrem prăk Búa Liềm Vàng, khă ƀu lu mơn, samơ̆ kâo ƀuh mơ-ak biă, djru kâo hmâo ƀiă prăk djru sang anô̆ kâo lơm anun”.

Jơlan hơdră “Hră pơkrem prăk Búa Liềm Vàng” dưi hmâo Ping gah plơi prong Buôn Hồ pok pơhai mơ̆ng blan 3 thun 2023. Kiăo tui anun, rim mơnuih apăn bruă, mơnuih ping gah amăng đơ đam plơi prong ngă tui pơkrem prăk hăng lu hơdră kah hăng mă tŭ sa hrơi prăk blan, gơgrong ba rim bruă, črăn bruă pơjing jơlan pơhrui prăk pioh pơjing keh prăk. Tơhnal phun lĕ rim thun rim mơnuih ping gah pơkrem hmâo mơ̆ng sa truh kơ dua “Hră pơkrem prăk Búa Liềm Vàng”; rim grŭp ping gah pơkrem hmâo sa “Hră pơkrem prăk Búa Liềm Vàng”. Tơdơi kơ 6 blan pơphun, plơi prong hmâo iâo pơhrui hmâo giăm truh 400 klăk prăk, pơjing 73 pok hră pơkrem prăk, nua rim hră pơkrem lĕ 5 klăk prăk, ƀơk brơi kơ mơnuih ping gah tơnap tap ƀơi plơi prong.

Yă Nguyễn Thị Thu Nguyệt, Khua git gai Ping gah plơi prong Buôn Hồ brơi thâo, bruă “Hră pơkrem prăk Búa Liềm Vàng”lĕ sa bôh yôm ƀu phrâo ôh, samơ̆ hơdră ngă hmâo lu tơlơi pơlih ba glăi bôh tŭ prong. Anai lĕ bruă mă tŭ yua, sit nik bruă mă, bruă gơgrong rơđah mơ̆ng rim mơnuih apăn bruă, mơnuih ping gah hăng rim grŭp Ping gah amăng bruă hrăm hăng ngă tui Wa. Bruă pơjing, ƀơk brơi“Hră pơkrem prăk Búa Liềm Vàng”dô̆ djru pơdŏng khul mơnuih apăn bruă ba gru hlâo gah pran jua, jơlan gah hơdip, nao hrŏm hăng grŭp ping gah:

 “Tơdah lăi djơ̆ mơn, blung a prăk anai akă lu samơ̆ ñu pơjing brơi laih jơlan klă, lar hyu prong amăng glông bruă Ping gah amăng đơ đam plơi prong hăng biă ñu pơjing brơi tơlơi lăng ba prong mơ̆ng mơnuih apăn bruă mơnuih ping gah ƀơi rim plơi pla. Tơlơi yôm phăn hloh, sa bôh yôm bruă kơđi čar tơhnal ping gah ƀơi anai ñu hluai tui bruă ƀơk Hră pơkrem prăk Búa Liềm Vàng anai kiăng pơkĕ hrŏm bruă gơgrong tơlơi pơmin mơ̆ng mơnuih ping gah hăng bruă gum hrŏm jơnum grŭp ping gah ƀơi anom bruă, biă ñu grŭp ping gah ƀơi plơi pla pioh pơđĭ tui klă bruă jơnum ping gah ră anai”.

Jơlan hơdră “Hră pơkrem prăk Búa Liềm Vàng”glăk ba glăi hơdôm bôh tơhnal sit nik, pơdah pran jua klă ană mơnuih, dưi hmâo mơnuih ping gah hăng mơnuih ƀôn sang ƀơi plơi prong Buôn Hồ, Dak Lak pơsit yôm, pơjing pran lar hyu amăng mơnuih mơnam./.