Rơbêh hơdôm pluh thun hăng anai, yă Ka Joen, dŏ pơ să Liêng Srônh, tơring glông Dam Rông, Lâm Đồng ƀuh na nao hơdôm wơ̆t pơkra glăi jơlan mrô 27 găn nao ƀơi anăp sang ƀing gơñu. Jơlan phrâo pơkra dua klâo blan răm dơ̆ng yơh, ƀuh lu amăng luh ƀlung hup, nao rai tơnap tap dơ̆ng yơh. Tơlơi anun hơmâo na nao lu thun, ngă kơ mơnuih ƀôn sang rô nao rai, bơwih ƀong huă bơbeč yua prong biă mă.

"Hơjan lĕ ia kah hăng ia dăo mơtam, ia dong hrup dơnao, nao rai ƀu thâo ƀuh jơlan ôh. Bơyan không lĕ ƀui tơplŭk, gôm ƀô̆ mơta”.

Lu črăn jơlan mrô 27 ăt tui anun mơ̆n. Atur jơlan arăng pơkra ming dơlit nao dơlit rai samơ̆ tañ răm biă mă, rô nao rai ƀu klă ôh, tơnap tap đut hlah. Ơi Đoàn Văn Vĩnh, dŏ pơ să Dă Rsal, tơring glông Dam Rông, Lâm Đồng brơi thâo:

“Lu črăn pơkra hlâo, giong laih răm dơ̆ng. Hơjan lĕ rơdêh prong găn nao ia črač djơ̆ mơsah abih mơnuih mơnam rô nao rai, lu mơnuih đĭ rơdêh thut tơl ƀu anăm bong, lê̆ trun bơrơbuh amăng akiăng jơlan, hnoh ia, hmua pơdai arăng. Mơmŏt mlam ƀing tơdăm đĭ rơdêh pơkiăo nao rai, weh rơdêh prong, jơjač djơ̆ amăng ƀlung prong ba truh pơjrom nao rao ăt lu wơ̆t laih mơ̆n”.

Jơlan mrô 27 lĕ jơlan phun pơtruh nao rai 2 boh tơring čar Lâm Đồng hăng Dak Lak, anŏ glông ataih 200 km, hơmâo tuh pơ alin pơkra jơlan rim črăn hăng ba yua mơ̆ng thun 1998. Tui hăng ơi Nguyễn Văn Gia, Khua gơnong bruă jơlan glông hăng pơdŭ pơgiăng tơring čar Lâm Đồng, rơnoh prăk pơkra jơlan anai yua Ding jum wai lăng jơlan glông brơi, rim thun pơkra ming mơ̆ng 40-50 klai prăk, kơnong djop brơi kơ tơring čar ming pơkra mơ̆ng 8-10 km đôč sa thun. Yua kơ bruă pơkra ming raih daih anun jơlan ăt răm na nao đôč.

“Hăng rơnoh prăk tui anun ƀuh rơđah laih ƀu djop yua ôh, anun yơh črăn jơlan anai pơkra giong tañ răm, črăn anai phrâo pơkra črăn pơkŏn pơčah dơ̆ng. Tơring čar ăt rơkâo sui laih, thun 2010 Ding jum wai lăng jơlan glông tŭ ư pơsit djru pơkra glăi jơlan anai năng ai 1.400 klai prăk. Khă tui anun, mơ̆ng anun truh ră anai, tơring čar rơkâo na ano Ding jum wai lăng jơlan glông aka ƀu lăi glăi ôh, lăi aka ƀu jŭ yap glăi rơnoh prăk tuh pơ alin pơkra glăi jơlan”.

Jơnum min mơnuih ƀôn sang tơring čar Lâm Đồng hơmâo ĕp hơdră, amăng anun rơkâo čih pơkra tơlơi phiăn brơi tơring čar Lâm Đồng tuh pơ alin pơkra jơlan, čan hlâo pioh pơkra ming. Khă tui anun, tui hăng ơi Phạm S, Kơ-iăng khua jơnum min mơnuih ƀôn sang tơring čar Lâm Đồng lăi, yua bruă anai aka ƀu hơmâo tơlơi pơkă brơi ngă tui anun yơh tơnap biă mă.

“Jơlan mrô 27 črăn găn nao pơ Lâm Đồng răm kơtang biă mă, pơkă hăng abih bang 128 arăt jơlan gưl dêh čar wai lăng amăng lŏn ia ta 14 thun rơgao, aka ƀu tuh pơ alin pơkra glăi ôh. Phrâo anai, kơ-iăng khua dêh čar ơi Trần Lưu Quang rai, Khua jơnum min mơnuih ƀôn sang tơring čar Lâm Đồng ăt hơmâo rơkâo laih mơ̆n, laih anun tơlơi rơkâo anai gơmơi ƀuh lăp biă mă. Yua rơnoh prăk mơ̆ng dêh čar aka ƀu djop anun yơh, ăt tŭ ư hrŏm mơ̆n hăng Kơ-iăng khua dêh čar, jao kơ Ding jum jơlan glông hăng pơdŭ pơgiăng pô ngă. Ding jum jơlan glông khom ngă hră lăi pơthâo pơkă hnong bơkơnar rơnoh prăk hăng rơkâo brơi tơring čar Lâm Đòng pô ngă tui. Khă tui anun, anai lĕ bruă ngă aka ƀu hơmâo djơ̆ ôh yua kơ anun, mah rơkâo laih samơ̆ tơnap mơ̆n ngă tui”.

Ră anai, rim thun, rơnoh prăk mơ̆ng kơnuk kơna tuh pơ alin lu klai prăk brơi pơkra ming glăi jơlan mrô 27 črăn găn nao pơ tơring čar Lâm Đồng samơ̆ jơlan ăt răm kơtang mơ̆n. Ƀuh rơđah tơlơi anai, bưp lu tơlơi tơnap tap kơ bruă rô nao rai, bơbeč prong kơ tơlơi bơwih ƀong huă mơnuih mơnam ƀơi tơring čar Lâm Đồng hăng amăng kual Dap Kơdư hnun mơ̆n.