Jơlan nao rai amăng tơring glông Čư̆ Sê-Čư̆ Pưh-Čư̆ Prông, tơring čar Gia Lai ataih rơbêh kơ 32 km, kah hăng sa blah bơnal băk găn hơdôm blah đang hmua, ia čroh hnoh, glai klô, tô Jơlan mrô 25, Jơlan mrô 14, găn lu să, tơring kual mơ̆ng 2 bôh tơring glông Čư̆ Pưh, Čư̆ Sê, truh pơ̆ hơdôm bôh să tơnap tap mơ̆ng tơring glông guai dêh čar Čư̆ Prông. Jơlan phrâo man pơkra giong, akă ĕp ƀuh amăng hla kak, samơ̆ bôh nik ñu rơdêh đuăi rơrăng laih, gơnam tam, pơdai kơtor găn nao rai. Ơi Mai Thế Chiến, ƀơi plơi Hợp Hòa, să Ia Drăng, tơring glông Čư̆ Prông brơi thâo, ñu lăng ƀuh rơđah hiưm hơpă ñu “mơ̆ng tơnap jing jơnap”. Jơlan hmâo ha tal amra tla glăi ngăn rơnoh yua kơ kaih rơnoh man pơkra, laih anun glăi man pơkra tañ pioh giong hlâo kơ thun phrâo, ba glăi tơhnal gal pơđĭ kyar prong kơ mơnuih ƀôn sang amăng kual:

 “Hlâo adih bruă nao rai mơ̆ng ƀing gơmơi glêh glar biă. Mơ̆ng sang nao pơ̆ să Ia Glar ƀudah Ia Mer thơ khom dar găn lu jơlan pha ra, pơ-iă lĕ ƀui, hơjan lĕ glut hlŭ. Jơlan anai pơkra giong mă yua gêh gal kơ neh wa ngă đang hmua amăng bruă sĭ mơdrô gơnam tam, ngă brơi gơnam neh wa dưi sĭ ƀơi sang pô mơ̆ nua lĕ hmâo hmăi dong. Tlao dong lĕ, jơlan pok tơbiă lu tơhnal gal bơwih ƀong huă kơ mơnuih ƀôn sang, biă ñu ƀơi kual guai dêh čar tơnap tap kah hăng ƀing gơmơi”.

Hrŏm hăng hơdôm rơwang bruă jơlan nao rai yôm phăn hmâo pơkra giong amăng thun 2023, kual Dap Kơdư ăt hmâo dong mơn lu rơwang bruă giăm pơkra giong, ƀudah glăk pơkra hăng pơhư prong phrâo. Sa amăng mrô anun lĕ jơlan tô nao rai hơdôm bôh să Ia Mlă, Đất Bằng, Phú Cần truh pơ̆ tơring kual Phú Túc, tơring glông Krông Pa, tơring čar Gia Lai ataih rơbêh kơ 8 km, prăk mă yua 90 klai prăk. Tui hăng ơi Hồ Văn Thảo, Khua Jơnum min mơnuih ƀôn sang tơring glông Krông Pa, jơlan anai pơkra giong giăm abih laih mrô bruă hăng amra ngă tui ba glăi bôh tơhnal rơđah rơđông biă, pơtrut wot bruă đang hmua hăng jơlan nao rai sĭ mơdrô gơnam tam:

 “Jơlan anai găn sa kual rơbêh kơ 1000 ektar lŏn ngă đang hmua hăng dŏng amăng kual yua ia hnoh Ia Mlă. Yua anun tơdah lăi djơ̆ mơn, jơlan anai ba glăi bôh tơhnal biă ngă prăk yua ngă đang hmua mơnuih ƀôn sang hrŏ trun lu hăng prăk pơhrui glăi đĭ lu. Hăng lơm tuh pơplai pơkra jơlan anai lĕ mơnuih ƀôn sang mơ-ak biă. Hlâo adih jơlan anai pioh nao rai rơngiă truh 2 mông ha mơkrah hăng kơnong kơ rơdêh thut đôč dưi nao rai, tơdơi kơ tuh pơplai pơkra jơlan anai abih bang gơnam mă mơ̆ng đang hmua hăng rô nao rai kơplah wah Phú Túc, Ia Mlă hăng Phú Cần”.

Hrŏm hăng hơdôm glông jơlan tô nao rai kual plơi pla, glông jơlan plơi prong ƀơi Dap Kơdư ăt dưi đing nao tuh pơplai lăp yap ba mơn. Kah hăng ƀơi Lâm Đồng, rơngiao kơ rơwang bruă pok prong jơlan čun čue Prenn tô plơi prong Đà Lạt hăng tơring glông Đức Trọng phrâo pơkra giong, dô̆ hmâo giăm truh pluh rơwang bruă amăng krah plơi prong Đà Lạt dưi pok pơhai. Ƀơi Dak Lak, jơlan Yŭ Ngŏ (jơlan Nguyễn Chí Thanh) tô tơdrŏn rơdêh por Buôn Ma Thuột hăng kual krah plơi prong hmâo mă yua laih, jơlan amăng tơring čar mrô sa tô Buôn Ma Thuột hăng tơring glông Buôn Đôn glăk pơkra glăi. Rơwang bruă jơlan nao rai tô Jơlan 26 – Jơlan 14 – Jơlan tơring čar mrô 8 hăng rơwang bruă pok prong jơlan Giải Phóng, plơi prong Buôn Ma Thuột ăt dưi pok pơhai mơn. Tơring kual Plei Kần, tơring glông guai dêh čar Ngọc Hồi, tơring čar Kon Tum ăt glăk pơplih drơi pô kơtang tit mơn hăng rơwang bruă ƀut jơlan gah Dơnung tơring kual, abih bang prăk mă yua rơbêh kơ 320 klai prăk. Amai Phạm Thị Thủy, mơnuih ƀôn sang ƀơi tơring kual brơi thâo, jơlan anai ƀu djơ̆ kơnong kơ djru mơnuih ƀôn sang gah Dơnung tơring kual nao pơ̆ kual krah gêh gal hloh ôh mơ̆, ñu dô̆ pok tơbiă tơhnal gal bơwih ƀong sĭ mơdrô, pơtrut tơring kual Plei Kần nao giăm hloh hăng tơhnal jing plơi prong:

 “Mơnuih ƀôn sang ƀơi anai mơ-ak biă yua kơ hmâo jơlan anai. Jơlan anai hiam biă, rô nao rai giăm hăng kual krah tơring kual, pioh lơm tơring kual jing plơi prong thơ amra hiam hloh, bơwih ƀong sĭ mơdrô thơ ăt gêh gal hloh mơn”.

Tơdah kah hăng hơdôm rơwang bruă jơlan nao rai ha rơtuh klai glăk rŭ đĭ tơhnal gal hluh gah tơring glông, luh gah să thơ hơdôm rơwang bruă jơlan nao rai ha rơbâo klai prăk glăi djru hơdôm bôh tơring čar Dap Kơdư ƀơƀrư̆ jing hơdôm plăng jơlan bơwih ƀong tŭ yua prong biă. Hmâo bôh tŭ yua biă amăng mrô anun lĕ Rơwang bruă jơlan đuăi hmar Buôn Ma Thuột-Khánh Hòa, abih bang prăk mă yua giăm truh 22 rơbâo klai prăk.

Tui kual pơkă truh thun 2030, tơhnal lăng truh thun 2050, jơlan đuăi hmar anai amra jing jơlan phun pioh jing sa amăng 5 glông jơlan bơwih ƀong mơ̆ng kual Dap Kơdư, hăng bruă mă dưi đing nao hlâo lĕ bơwih ƀong sĭ mơdrô hăng pơgiăng gơnam tam. Dưi pok phun pơkra mơ̆ng blan 6 thun 2023, ră anai jơlan Buôn Ma Thuột-Khánh Hòa amra pơjing. Ơi Đặng Thọ Dần, Kơ-iăng Khua Anom git gai bruă jơlan nao rai, Grŭp wai lăng hơdôm Rơwang bruă jơlan nao rai hăng bruă đang hmua pơđĭ kyar ƀôn lan tơring čar Dak Lak brơi thâo, rơwang bruă anai glăk dưi pơkra tañ:

  “Ră anai, tơdơi kơ hmâo anih man pơkra thơ hơdôm anom gơgrong man pơkra đing nao tañ pok pơhai čuk lŏn pơkra jơlan nao rai hrŏm ƀơi hơdôm jơlan nao rai pioh pơkra jơlan phun. Kah hăng anung prăk mrô sa lĕ 100% hmâo laih jơlan pioh djru man pơkra. Bơ̆ anung prăk 2 lĕ ăt giong laih mơn 70%. Anung prăk 3 ăt phun ñu mă yua jơlan hăng glăi dưi hmâo pô gơgrong man pơkra pok pơhai tañ mơn”.

 Thun 2023 jing thun hơdôm bôh tơring čar Dap Kơdư leng kơ bưp tơnap prong gah pơtrut hơdôm tuh pơplai bruă hrŏm, samơ̆ bruă anai dưi pơplih amăng hơdôm blan rơnuč thun hăng jai pơplih rơđah hloh amăng blan akô̆ thun 2024, biă ñu hăng hơdôm rơwang bruă jơlan nao rai.

 Hơdôm rơwang bruă jơlan nao rai amăng kual, rơwang bruă hmâo tơhnal luh gah kual dưi pok pơhai kơtang tit, glăk amăng ƀrư̆ tô hơdôm glông jơlan bơwih ƀong sĭ mơdrô mơ̆ng rim tơring čar, mơ̆ng kual hăng mơ̆ng đơ đam kual Tŏng Krah dêh čar - Kual Dap Kơdư, pơjing dong pran pơtrut pioh pơđĭ kyar bơwih ƀong mơnuih mơnam./.