Ƀing khua mua đing nao pơčrông sai, pơgôp hiăp hăng 17 črăn tơlơi phiăn yôm phăn, him lăng mơ-it nao Khua pơ ala mơnuih ƀon sang dêh čar amăng jơnum lok 2, Khua pơ ala mơnuih ƀon sang dêh čar tal XVI. Đĭ pơhiăp amăng mông pok pơphun, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong tơlơi rơkâo hrưn đĭ klă amăng bruă čih pơkra tơlơi phiăn, pok blung mơng ngă klă hơdră bruă, ƀu kiăo tui lu tơhnal pơkă. Hơdôm črăn tơlơi phiăn kiăng pơsir hĭ hơdôm bruă sit nik, pơsir hĭ tơlơi gun, pok phư ngăn rơnoh, wai pơgang brơi tơlơi dưi djơ̆ tơlơi phiăn mơng mơnuih ƀôn sang, anom bơwih ƀong sĭ mơdrô.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo anăm pơplih hơdôm bruă tơnap tao, bơdjơ̆ nao tơlơi dưi ană mơnuih, tơlơi dưi mơnuih ƀôn sang, tơlơi gal bơwih ƀong sĭ mơdrô, kah pơpha ngăn rơnoh hăng khul grup ngă bruă phun trun amăng tơlơi pơtrun pơsit. Laih dong, bruă čih pơkra tơlơi phiăn kiăng pơhlôm brơi ha amăng plĕ kơplah wah hơdôm tơlơi phiăn, lăp djơ̆ hơbô̆ bruă gong gai ƀon lan dua gưl, pơtrut kơtang kah gưl, jao bruă, kiăng hơdôm tơlơi pơkă lơm ba mă yua dưi pok pơhai tŭ yua amăng tơlơi sit nik.