VOV4.Jarai-Lơ 16/9, Jơnum min mơnuih ƀôn sang tơring čar Dak Nông jơnum bơkơtuai boh thâo phrâo, pơgôp hiăp kơ Akŏ bruă pơkă hnong tơring čar Dak Nông mơ̆ng thun 2021-2030 lăng nao pơ thun 2050, hăng hơmâo lu anom bruă, khua mua, kông ty dêh čar tač rơngiao, ƀing pơ ala kơ group sĭ mơdrô prong nao pơhmư̆. Ƀơi mông jơnum, lu khua mua pơblang tong ten, pơgôp hiăp kơ Dak Nông khom thâo rơđah hơdôm tơlơi dŏ kơƀah laih anun rơkâo đĭ hơdră mă bruă pioh kơ tơring čar pơđĭ tui tơlơi thâo, mă yua klă tơlơi gêh găl, anŏ kơtang, ngă rai tơlơi pơblih kơtang pơtrut pơđĭ kyar bơwih ƀong huă mơnuih mơnam.

Mông jơnum bơkơtuai abih bang

Tui hăng nai prin tha ơi Nguyễn Trọng Uyên, Kơ-iăng khua hơđăp Anom bruă kơsem min pơkă hnong laih anun dăp bruă ngă hmua dêh čar, sa amăng hơdôm bruă kiăng đing nao lĕ pơkă hnong hơdai gum hrom tơring čar Dak Nông khom pơđĭ boh tŭ yua anŏ gêh găl phara hơjăn. Anŏ phara tơring čar lĕ hơmâo eh pơsơi amăng gŭ lŏn prong hloh rŏng lŏn tơnah, hơmâo ayuh hyiăng rơ-ot rĭm blan amăng thun, hơmâo đang hyu lăng amăng gŭ lŏn jar kmar UNESCO pơsit; dŏ ƀơi anih gêh găl pơtruh nao rai kual Dap Kơdư hăng kual dơnung ngŏ; anun yơh anŏ gêh găl pioh kơ tơring čar anai pơđĭ kyar kơtang kơ bruă tuh tia pơkra ming mă kông ngăn amăng lŏn hăng ba tuai hyu ngui.

Nay Jek: Pơblang