Nao čuă hăng mă bruă ƀơi tơring čar Gunma, Khua dêh čar Phạm Minh Chính brơi thâo ñu lăp hơdor biă hăng boh than đĭ kyar bơwih ƀong huă mơnuih mơnam mơ̆ng tơring čar, hăng tơlơi hmư̆ hing jing sa amăng hơdôm anom bruă pơđĭ kyar pơkra măi mok prong hloh Japan. Khua dêh čar bơni biă mă kơ gong gai tơring čar gir ngă bruă, pơtrut ngă hrŏm hăng Việt Nam amăng djŏp bruă. Hrơi blan pơ anăp, Khua dêh čar čang rơmang hơdôm anom bơwih ƀong tơring čar Gunma, Japan, hăng tơlơi rơgơi, tơlơi hơmâo, tơlơi kơdrưh mơ̆ng ƀing gơñu, amra djru, gum hrŏm hăng Kơnuk kơna laih anun hơdôm anom bơwih ƀong Việt Nam pok prong tơlơi ngă hrŏm tuh pơ alin amăng hơdôm bruă mơ̆ dua bơnah hơmâo lu tơlơi gêh gal, laih dong hyu ĕp bruă ngă hrŏm phrâo dong.

Pơsit Việt Nam jing sa amăng hơdôm anih ngă pơhưč, đĭ kyar, Khua tơring čar Gunma pơsit amra pơphun pơbưp grup anom bơwih ƀong nao čuă Việt Nam; pơtrut ngă hrŏm tuh pơ alin, sĭ mơdrô kơplah wah dua bơnah; čang rơmang Kơnuk kơna Việt Nam djru brơi kiăng anom bơwih ƀong tơring čar Gunma ngă bruă amuñ lơ̆m bơwih ƀong pơ Việt Nam laih anun hơmâo lu hloh anom bơwih ƀong Việt Nam tuh pơ alin pơ Gunma.