Tơlơi pơtrun mrô 79-NQ/TW lơ 06/01/2026 mơ̆ng Ding jum kơđi čar kơđŏm gru pơplih mơ̆ng blung a tơlơi pơmin đĭ kyar bơwih ƀong huă Kơnuk kơna: Mơ̆ng tơlơi gơgrong “bong kjăp, abih bang hlom bom” jing tơlơi gơgrong pơčeh phrâo, pơčrâo jơlan hăng pok jơlan kiăng đĭ kyar anŏ klă, amăng tơlơi ngă bruă pơdjru nao rai hăng bơwih ƀong mơnuih ƀôn sang ngă pô. Lơ̆m anun, Tơlơi pơtrun mrô 80-NQ/TW, lơ 07/01/2026 mơ̆ng Ding jum kơđi čar kơ đĭ kyar gru grua boh thâo jing tơlơi yom kơtang biă amăng mông anai; kiăng đĭ kyar gru grua amăng hrơi mut hrŏm jar kmar, anun lĕ hlong či mut hrŏm mă mơ̆ng ƀing ta.

Tơlơi phrâo ƀơi Tơlơi pơtrun 80 lĕ lăng nao abih bang, pơplih phrâo hăng đĭ kyar gru grua boh thâo đưm. Tal blung a gru grua đưm hơmâo dưm hrŏm kjăp hăng tơlơi bơwih ƀong, anih mơdrô hăng djŏp bruă pơkra gơnam bơdjơ̆ nao gru grua, lăng gơnam mơ̆ng gru grua jing sa tơlơi gêh găl či đĭ kyar hăng jing tơlơi yom biă mă mơ̆ng “pran kơtang rơ-un” dêh čar ta. Pơhiăp git gai mông jơnum, Khua git gai Ping gah ơi Tô Lâm brơi thâo, dua Tơlơi pơtrn phrâo čih pơkra kiăo tui phun atur lăng glăi dlăm djŏp djel tơlơi hơmâo sit hăng tơlơi pơmin djơ̆ găl amăng hrơi mông lŏn ia ta glăk mut amăng rơnuk đĭ kyar phrâo, laih dong pơsir hĭ dua tơlơi ngă phun atur lĕ “tơlơi kơtang mơ̆ng gơnam” hăng hơkrŭ kjăp “tơlơi kơtang mơ̆ng pran jua” dêh čar. Pơsit khŏm gir akŏ pơdong tơlơi bơwih ƀong ngă mă pô, hơdeč hmar, pran jua hur har, tŭ yua nao hrŏm hăng mut hrŏm jar kmar dlăm hloh laih anun akŏ pơjing gru grua phun Việt Nam pơplih phrâo, rơgơi hloh, djă gru grua hiam mơ̆ng djuai ania.