Mơguah lơ 16/11, ƀơi Ƀirô Ping gah, Khua git gai Ping gah dêh čar ơi Nguyễn Phú Trọng pơphun Jơnum đơ đam dêh čar hruă kjăp hăng pok pơhai ngă tui tơlơi pơtrun mrô 26 mơng Ding jum kơđi čar kơ hơdră pơđĭ kyar bơwih ƀong huă-mơnuih mơnam, pơhlôm rơnuk rơnua pơđĭ kyar kual Kơdư tong krah hăng ter hang ia rơsĭ tong krah truh thun 2030, anăp nao truh thun 2045, jơnum pơphun ƀơi anăp hăng lăng nao rai mơng ataih, anih phun lĕ plơi prong jưh jom Hà Nội lăng nao rai ƀơi hơdôm tơring čar, tơring glông hăng anih anom ƀơi ƀon lan.

Đĭ pơhiăp git gai mông jơnum, Khua git gai Ping gah dêh čar ơi Nguyễn Phú Trọng lăi pơtong, tơlơi pơmĭn, hơdră git gai mơng tơlơi pơtrun lĕ pơđĭ kyar kual kơdư tong krah hăng ter hang ia rơsĭ kual tong krah lăp djơ̆ hăng hơdră pơđĭ kyar bơwih ƀong huă-mơnuih mơnam, hơdră pơđĭ kyar hơđong kjăp, mơtah mơda hăng pơđĭ kyar hơđong kjăp bơwih ƀong huă ter hang ia rơsĭ dêh čar Việt Nam. Pơđĭ kyar hơđong kjăp amăng kual ia rơsĭ, ngă pơdrông sat mơng ia rơsĭ hluai tui bruă mă yua hơdôm tơlơi dưi, biă mă ñu mơng kual ia rơsĭ; pơđĭ kyar hăng hrưn đĭ tŭ yua mơng hơdôm anih anom glăk hơmâo; hơdôm kual bơwih ƀong ter hang ia rơsĭ, kual tuh tia pơkra pơjing, plơi prong ter hang ia rơsĭ, hơdôm kual bơwih ƀong; hơdôm gơnong bruă bơwih ƀong amăng kual ia rơsĭ.