Amăng thun 2025, tơlơi truh lŏn adai ngă răm ƀăm kơtang biă mă kơ mơnuih hăng kông ngăn, jơlan glông, pưk sang đang hmua, bơbeč tơnap kơ tơlơi hơdip mơda, bruă bơwih ƀong huă mơ̆ng mơnuih ƀôn sang hăng tơlơi ngă bruă mơ̆ng abih bang mơnuih mơnam. Yap truh lơ 31/12/2025, tơlơi truh lŏn adai ngă, hơmâo ngă kơ 484 čô mơnuih djai, rơngiă; 811 čô mơnuih rơka rơkač. Rơnoh jŭ yap anŏ răm ƀăm truh kơ 104.733 klai prăk.

Pơhiăp ƀơi mông jơnum, Khua dêh čar ơi Phạm Minh Chính lăi pơtong, tơhnal anăp nao pơgang tơlơi rơnuk rơnua hơđong kơ ană mơnuih, pơgang bruă mă tơlơi hơdip mơda kơ mơnuih ƀôn sang yơh hnang blung, hlâo hloh; pơgang kông ngăn, dram gơnam kơnuk kơna, kông ngăn mơnuih ƀôn sang klă hloh; lăng kơ mơnuih ƀôn sang yơh jing anŏ phun, pô či ngă amăng bruă pơhlom, pơgang tơlơi truh lŏn adai ngă, lir hơbit hăng bruă ngă tui 2 tơhnal pơkă 100 thun hăng anăp nao pơđĭ kyar hmar, hơđong kơjăp kiăng djru hrŏm pơđĭ kyar truh dua mrô. Ngă tui jơlan hơdră “Prăp lui hlâo pơhlom pơgang-Lăi lui hlâo tong ten-Pơhŭi hlâo djơ̆ găl-Bong glăi hmao kru”, Khua dêh čar rơkâo djop gưl anom bruă, djop tơring čar, plơi pla amăng djop mông mơnit sit hơmâo tơlơi truh, khom pơgang tơlơi suaih pral, tơlơi hơdip mơda mơnuih ƀôn sang yơh hlâo, ƀu dưi ngă amưng ôh, ƀu sư̆ rơbư̆, dŏ tơguan đôč đač; bruă pơhlom pơgang hăng pơhrŏ đut tơhnal tơlơi răm ƀăm truh yua lŏn adai ngă; yua kơ tơhnal pơkă prong hloh lĕ khom pơgang tơlơi rơnuk rơnua hăng tơlơi mơak klă kơ mơnuih ƀôn sang yơh phun.