Amăng mông jơnum anai, ƀing khua pơ ala đing nao bơkơtuai kơ: Rơkâo čih pơkra Tơlơi phiăn wai lăng, mă yua phao kơtuang, gơnam ngă pơtuh hăng gơnam djru ngă pơtuh; rơkâo čih pơkra Tơlơi phiăn pơplih pơkra, pơhrua nao sa dua mơta tơlơi mơ̆ng Tơlơi phiăn lăi pơhưč; tơlơi mă yua hră pơ-ar pơkă rơđah hăng pơtô brơi ngă tui hơdôm Tơlơi phiăn, Phiăn pơtrun, Tơlơi pơtrun pơsit mơ̆ng Khua pơ ala mơnuih ƀôn sang, Jơnum min apăn bruă Khua pơ ala mơnuih ƀôn sang dêh čar ta hmâo mă yua laih tơlơi phiăn, tơlơi pơtrun pơsit mơ̆ng Khua pơ ala mơnuih ƀôn sang, Jơnum min apăn bruă Khua pơ ala mơnuih ƀôn sang.

Pơhiăp amăng mông jơnum, Khua dêh čar ta, ơi Phạm Minh Chính lăi rơđah pran jua kơtưn pơplih pơkra, hrŏ trun đuh hlah hră pơ-ar, hrŏ trun rơkâo – brơi, hrŏ trun prăk apah ngă hră pơ-ar, pơgăn ngă tơnap, ngă gêh gal brơi kơ mơnuih ƀôn sang hăng anom bơwih ƀong hrŏm hăng pơpha ngăn rơnoh lăp djơ̆ hăng kơtưn lăng tui, pel ĕp; hơduah lăng glăi bôh yôm hơpă pioh glăi, bôh yôm kiăng ngă giong, pơhrua nao, bôh yôm hơpă kiăng lui hĭ. Khua dêh čar ta lăi lĕ, hơdôm bôh yôm mơ̆ng mông jơnum anai leng kơ hơdôm bôh yôm phăn; ƀing khua pơ ala tum pơƀut bôh thâo ia rơgơi, bơkơtuai hơdôm tơlơi yôm phăn, dô̆ tơlơi gum pơhiăp pha ra, pơhlôm rơnoh bruă, anô̆ kơjăp bruă jơnum./.