Khua dêh čar ta ơi Phạm Minh Chính ba jơlan hlâo grŭp pơ ala kơ Việt Nam nao pơhmư̆ mông pok phun. Pơhiăp amăng mông ngă lơphet pok phun, Khua dêh čar Kur Samdech Techo Hun Sen lăng yôm bôh tŭ yua hơdor glăi 55 thun hrơi pơdŏng ASEAN, găn rơgao sa črăn jơlan ataih mơng pơlir hơbit hăng gum hrom kual, pơtrut tơlơi pơkĕ hrom kơplah wah hơdôm bôh dêh čar amăng khul ASEAN yua kơ tơhnal pơkă hrom lĕ rơnuk rơnua, gơgrong pô hăng pơđĭ kyar.

Jơnum gưl dlông ASEAN tal 40, 41 hăng hơdôm Jơnum gưl dlông bơdjơ̆ nao lĕ tal kiăng hơdôm bôh dêh čar lăng glăi hăng pơsit pran hrưn đĭ kơ sa pơgi kơdih gum hrom hơbit, gơgrong pô, pơhlôm abih hăng hluai tui tơlơi phiăn. Lu tơlơi lăi pơtŏng yôm phăn amra dưi lăng kah hăng Tơlơi lăi pơtŏng hơdor glăi 55 thun hrơi pơdŏng ASEAN, Tơlơi lăi pơtŏng ASEAN gum ngă: Gum bŏng glăi tơlơi lông hăng Tơlơi lăi pơtŏng Bruă tô nao rai ASEAN tơdơi kơ thun 2025, jing hơdôm jơlan gah pơsit hơdră bruă kiăng pơtrut gum hrom bơwih ƀong, pơđĭ kyar dưm kơnar, tô nao rai hluh gah hăng djă pioh bruă phun mơng ASEAN amăng hơdră pơkă kual.           

Tơdơi kơ mông jơnum pok phun mơtăm, Khua mua hơdôm bôh dêh čar kual ASEAN pơhmư̆ mông jơnum abih bang Jơnum gưl dlông ASEAN tal 40 hăng mông jơnum mă ƀiă Jơnum gưl dlông ASEAN tal 41./.