VOV4.Jarai - Lơ 20/9, ƀơi tơring čar An Giang pơphun Jơnum jar kơmar pơkra jơlan guai kơplah wah Việt Nam hăng Kur mơ-ak klă, giăng mah, gum hrom pơđĭ kyar tal 6  thun 2022. Pơhiăp amăng mông pok phun jơnum, ơi Lê Tiến Châu, Kơ-iăng Khua – Khua čih pioh Jơnum min djop djuai ania mơnuih mơnam dêh čar Việt Nam lăi rơđah, tơdơi kơ 5 thun kĭ pơkôl Tơlơi lăi pơthâo hrom bôh tơhnal Jơnum jar kơmar kơ pơkra jơlan guai mơ-ak klă, giăng mah Việt Nam – Kur, hơdôm bôh yôm dưi pok pơhai, ngă tui jai hrơi jai prong tui ƀơi hơdôm gưl, hmâo bôh tơhnal sit nik, biă ñu ƀơi hơdôm bôh tơring čar hmâo ha mơguai, djơ̆ hăng tơlơi čang rơmang hrom mơng mơnuih ƀôn sang dua bôh dêh čar.

Jơnum min djop djuai ania mơnuih mơnam dêh čar Việt Nam hăng Khul Jơnum min gum hrom hơbit pơđĭ kyar lŏn ia Kur kĭ pơkôl Tơlơi lăi pơthâo hrom tal 6

Amăng mông jơnum anai, ƀing khua pơ ala gum hrom bơkơtuai, pơsit bôh tơhnal pok pơhai ngă tui Tơlơi lăi pơthâo hrom amăng mông Jơnum tal 5, gum pơhiăp kơ bôh yôm čih pơkra “Hră lăi pơthâo hrom bôh tơhnal kơ bruă Jơnum jar kơmar pơkra jơlan guai kơplah wah Việt Nam – Kur mơ-ak klă, giăng mah, gum hrom pơđĭ kyar tal 6, thun 2022”, hrom hăng anun, ba tơbiă hơdôm tơlơi pơplih phrâo wot bôh yôm, hơdră kiăng pơđĭ tui tơhnal sit nik ba glăi bôh tŭ yua gum hrom kơplah wah dua bơnah pơ̆ anăp anai./.

Siu H’ Prăk: Pơblang