Jơnum anai yôm biă mă amăng bruă ngă tui tŭ yua tơlơi gơgrong mơ̆ng khul kah pơpha bruă mă amăng kual, hrŏm hơbit pơčrong sai kơ anŏ “boh nut hruă” ƀudah lăng hrup gai kăl, anŏ kơđông hĭ bruă pơđĭ kyar hlăk bưp laih anun pơdah thâo tơhnal pơkă, anăp ngă bruă, hơdră pơsir pơphun ngă tui pơ anăp adih; pơtrut ngă hrŏm lir hơbit amăng kual, pơlir hơbit ngă tui tơhnal pơkă pơđĭ kyar kual Dap Kơdư “Mơtah-mut hrŏm-hơđong kjăp”.

Khua mua pơ ala mơnuih apăn bruă djop ding jum, anom bruă dêh čar, djop tơring čar amăng kual Dap Kơdư, ƀing mơnuih rơgơi kơhnâo hăng ƀing mơnuih kơsem min boh thâo ia rơgơi nao jơnum djru pơgôp hiăp amăng akŏ bruă čih pơkra pơkă bruă ƀơi Dap Kơdư. Truh ră anai, akŏ bruă pơkă bruă Dap Kơdư hơmâo mơ-it truh pơ abih ding jum, anom bruă kiăng čih pơkra pơhrua brơi djop tal 2, ăt dŏ tơguan lu tơlơi pơgôp hiăp mơ̆ng djop ding jum, anom bruă, tơring čar amăng kual hăng ƀing mơnuih rơgơi kơhnâo kơsem min kiăng Akŏ bruă pơkă bruă Dap kơdư pơđĭ kyar djơ̆ găl hăng anŏ pơđĭ kyar hrŏm amăng lŏn ia, ba kual Dap Kơdư pơđĭ kyar mơtah mơda hla kyâo lu hăng hơđong kjăp, dưi bong glăi hăng anŏ pơblih ayuh hyiăng lŏn tơnah.