Pơhiăp đĭ ƀơi mông jơnum, Khua ding jum bruă čar dêh čar Việt Nam, ơi Đỗ Thanh Bình lăi pơtong, anai lĕ mông gêh găl lăng glăi boh tơhnal ngă hrŏm thun blan laih rơgao hăng pok pơhư prong črăn mă bruă tŏ tui kiăng tong ten hloh, tŭ yua lu.

Pơđut mông jơnum, dua čô khua ding jum hơmâo kĭ hră pơkôl hơdor pioh amăng bruă mă hăng djru mơnuih ƀôn sang hơmâo gum kơnuk kơna, kiăng ngă kơjăp tui bruă mă giăng mah gru grua, tơlơi gum pơgôp nao rai yom phara biă mă mơ̆ng dua bơnah kơnuk kơna dêh čar. Tui hăng tơlơi kĭ pơkôl, dua bơnah pơtrut ngă hrŏm pơsir bruă mă, pơgang rơnuk rơnua, wai lăng mơnuih hyu mă bruă apah, anăp nao pơgang tơlơi dưi anŏ tŭ yua kơ mơnuih mă bruă apah hăng djru hrŏm bruă pơđĭ kyar bơwih ƀong huă mơnuih mơnam mơ̆ng rĭm boh dêh čar.