Amăng mông jơnum, ƀing khua mua hơmâo pơlăi nao rai tơlơi găn rơgao, tơlơi gal amăng ngă hrŏm man pơdong, pơđĭ kyar plơi prong hăng ƀon lan mơng hơdôm boh dêh čar ding kơna kual ASEAN hăng Khač, mơng anun pơgôp ngă tui truh kih Jơlan hơdră bruă mă thun 2030 kơ pơđĭ kyar hơđong kjăp mơng Sang gum hơbit djop dêh čar. Đĭ pơhiăp ƀơi anai, Khua ding jum man pơdong Nguyễn Thanh Nghị brơi thâo, Việt Nam dong amăng grup 10 boh dêh čar juăt răm rai kơtang lơm hơmâo hơjan kơthel amăng rŏng lŏn tơnah.

Khua ding jum ơi Nguyễn Thanh Nghị lăi pơthâo hơdôm tơlơi pơmĭn hăng jơlan gah pơđĭ kyar plơi prong hơđong kjăp, mơtah, rơgơi, dưi bong glăi ayuh hyiăng pơplih sat, hrŏ ƀiă asăp sat, lăng ană mơnuih lĕ akŏ phun hăng ƀu pioh hlơi dŏ glăi gah tlôn. Khua ding jum đăo gơnang, hơdôm tơlơi pơlăi nao rai amăng mông jơnum anai hrŏm hăng tơlơi pơsit “Mut hrŏm Nam Ninh” amra pơgôp yôm phăn, sit nik amăng pơtrut ngă hrŏm djop mơta kual ASEAN hăng Khač lăi hrŏm, ngă hrŏm ASEAN hăng Khač amăng bruă man pơdong, pơtrut hrưn đĭ kơtang ƀiă dong, sit nik ƀiă dong.