Jơnum Khua ding jum tal 18 kơ pơlir hơbit bơwih ƀong huă Việt Nam-Singapore hơmâo pơphun ƀơi dêh čar Singapore tui tơlơi git gai mơng Khua ding jum kơčăo bruă hăng tuh pơ alin ơi Nguyễn Chí Dũng hăng Khua ding jum tal dua Ding jum tuh tia pơkra ming hăng sĭ mơdrô ngă rah khua ding jum wai lăng mơnuih mă bruă Singapore, ơi Tan See Leng. Amăng mông jơnum tal anai, dua bơnah ăt lăi pơthâo hăng pơlăi nao rai sa, dua boh than dưi ngă dong mơng hrơi pơphun jơnum khua ding jum tal 17 ƀơi Hà Nội ƀơi Việt Nam, dong mơng blan 8/2023 truh ră anai; hơmâo: tơlơi pơplih pơjing akŏ bruă pok pơhai tơlơi rô nao rai bơwih ƀong mơta-bơwih ƀong mrô; boh than ngă hrŏm amăng pơplih pơčeh phrâo.

Hluai tui jơnum khua ding jum kơ pơlir bơwih ƀong huă Việt Nam-Singapore tal 18, Việt Nam hơmâo pơsit tong hơdôm tơlơi pơmĭn hăng tơlơi đing nao amăng ngă hrŏm bơwih ƀong huă hăng Singapore kiăng ngă dơlăm tui tơlơi rô nao rai ngă hrŏm kơplah wah dua boh dêh čar; rơkâo gah dêh čar Singapore gir run gum hrŏm pok pơhai, ngă tui hơdôm tơlơi pơčeh phrâo tui tơlơi pơkôl pơkă pơlir hơbit; pơtrut pơsur hơdôm anom bơwih ƀong sĭ mơdrô Singapore ba tơbiă hơdôm tơlơi rơkâo ngă hrŏm phrâo hăng kơtưn tuh pơ alin ƀơi Việt Nam.