Ƀơi mông jơnum hrŏm khua mua ASEAN+3 tal 26, hơdôm bơnah pơtong glăi boh yôm phun mơ̆ng bruă ngă hrŏm ASEAN+3 hăng tơlơi rơnuk rơnua, hơđong, ngă hrŏm hăng pơđĭ kyar. Khua mua ASEAN+3 tŭ ư hrŏm pok pơhai tŭ yua hloh Akŏ bruă ngă hrŏm ASEAN+3 črăn mơ̆ng thun 2023-2027, amăng anun djă kjăp tơlơi kơtang ngă hrŏm bơwih ƀong huă, sĭ mơdrô, prăk kăk, ia jrao gun...hăng pok pơhư prong amăng bruă ngă hrŏm phrâo dơ̆ng, pơtum nao kơ bruă pơblih pơčeh phrâo ia rơgơi, pơhlôm hơđong djop mơnong ƀong huă, pơblih bruă yua ia săng hăng anŏ pơhrua ia săng phrâo hơdjă rơgoh, bŏng glăi anŏ pơblih ayuh hyiăng,...anăp nao kơ bruă pơđĭ kyar hlom bom hăng hơđong kjăp.

Khua dêh čar ơi Phạm Minh Chính pơdah rai pran jua čang rơmang ASEAN+3 amra hơmâo tơlơi gơgrong ba phun tŭ yua hloh, hur har  amăng bruă pơdah thâo lu hơdră bruă dưi ngă, hrŏm hơbit găn rơgao hĭ tơlơi tơnap tap, lông lăng ră anai.

Ƀơi mông jơnum khua mua ASEAN-Mi tal 11, Kơ-iăng Khua mir sir dêh čar Mi, yă Kamala Harris lăi pơtong, dêh čar Mi ƀuăn kơtang, bŏng sui thun hăng ASEAN laih anun amăng kual, dong yua ASEAN pô gơgrong phun, dua bơnah amra kah pơpha tơlơi tŭ yua, bruă ngă thâo thăi, đing nao hlâo hăng lăng nao pơ anăp adih sui thun, hrŏm hơbit bŏng glăi tơlơi lông lăng hrŏm amăng kual.

Ƀơi mông jơnum, khua mua ASEAN-Canada, hơdôm bơnah ăt tŭ ư pơsit hĭ Hră pôr hrŏm sit nik akŏ pơjing bruă ngă yôm hloh ASEAN-Canada. Lơ 7/9/2023, Khua mua hơdôm dêh čar nao jơnum ASEAN hăng India laih anun jơnum kual Ngŏ ASIA iâu klah čun (EAS). Gah rơngiao kơ mông jơnum, amăng lơ 6/9, Khua dêh čar ơi Phạm Minh Chính hơmâo bưp laih hăng Khua dêh čar Canada ơi Justin Trudeau, Khua dêh čar Japan, ơi Kishida Fumio, bưp Khua mir sir dêh čar Hàn Quốc ơi Yoon Suk Yeol hăng Khua dêh čar Khač ơi Lý Cường.