VOV4.Jarai - Tơdơi kơ 2 hrơi mă bruă, mơguah lơ 14/10, Jơnum khua pơ ala Khul hlăk ai rơnuk Hồ Chí Minh tơring čar Gialai tal 15 (rơwang bruă 2022-2027) truh kih klă hiam. Jơnum hmâo pel ĕp hơdôm tơhnal pơkă mơng rơwang bruă 2022-2027. Amăng anun, rim thun, 100% mơnuih mă bruă Khul, mơnuih amăng khul, 80% mrô tơdăm dra dưi hrăm, lăi pơthâo, lăi pơhing, pơtô brơi tơlơi pơtrun pơsit, hơdră pơtrun mơng Ping gah, hơdră bruă, tơlơi phiăn mơng Kơnuk kơna hăng tơlơi pơtrun pơsit, klah čun, hơdră pơtrun mơng Khul.

Pơhư prong gru ba jơlan hlâo, tơlơi ruai hiam klă amăng hrăm hăng ngă tui tơlơi pơmin, pran jua, kơnuih Hồ Chí Minh. Rim thun, pla phrâo ƀiă biă ñu 300.000 ƀĕ phun kyâu. Gum hrom pơphun lăi pơthâo, pơtô brơi bruă mă kơ 40.000 čô mơnuih hlăk ai djuai ania ƀiă; lăi pơthâo, pơtô brơi bruă mă kơ 20.000 wot čô tơdăm dra... Jơnum hmâo ruah laih Grŭp mă bruă khul Hlăk ai tơring čar Gialai tal 15 hmâo 40 čô mơnuih; Grŭp apăn bruă Khul hlăk ai 11 čô mơnuih; Ƀing hlăk ai pơ ala kơ khul ăt hmâo ruah mơn 11 čô mơnuih nao pơhmư̆ Jơnum khua pơ ala Khul hlăk ai rơnuk Hồ Chí Minh đơ đam dêh čar tal 12, rơwang bruă 2022-2027./.

VOV.TN čih

Siu H’ Prăk pơblang