Pơhiăp klah čun ƀơi mông jơnum, Khua dêh čar ơi Phạm Minh Chính yap glăi boh tơhnal dưi ngă pơđĭ kyar bơwih ƀong huă mơnuih mơnam amăng kual, Khua dêh čar bơni kơ ƀôn prong Hồ Chí Minh, tơring čar Bình Dương, Bà Rịa-Vũng Tàu, Đồng Nai....hơmâo dưi ngă ba glăi boh tơhnal tŭ yua yom amăng bruă pơđĭ kyar hrŏm amăng dêh čar. Khua dêh čar rơkâo pơ anai GDP amăng kual dưi pơđĭ kyar truh 7%, lu hloh amăng dêh čar.

Thun 2025, Khua dêh čar rơkâo đing nao rơnoh pơđĭ kyar, gir run truh 2 mrô, yua kơ tui hăng Khua dêh čar đăo lăng hlâo, rơnoh pơđĭ kyar tui hluai hơnơ̆ng bơwih ƀong huă kah dưi, pơblih pran kơtang mă bruă, hnun kah hơmâo prăk tuh pơ alin glăi pioh pơtrut pơđĭ kyar, pơhlôm hơđong rơnuk rơnua, hơđong kơđi čar, pơđĭ tui tơlơi hơdip mơda mơnuih ƀôn sang.