Pơhiăp ƀơi mông mă bruă, Khua mir sir ơi Lương Cường lăi pơtong, kiăng pơtrut kơtang bruă mă dăp glăi bruă ping gah amăng anom bruă tơgŭ kơđi kiăng tơpă, rơgoh, kơtang; pơđĭ tui tơlơi git gai mơ̆ng Ping gah hăng bruă mă tơgŭ kơđi, kiăng pơhlôm ngă djơ̆ tơlơi phiăn pơtrun, djop mơnuih ngă khua pô, kơtưn tơlơi gơgrong ba mơ̆ng djop gưl anom bruă ping gah, sang bruă khul ping gah, gong gai kơnuk kơna hăng khul grup mơnuih tơpuôl amăng anom bruă tơgŭ kơđi.

Pơdjơ̆ nao ngă hơbôt tui anom bruă, mrô mơnuih mă bruă, Khua mir sir pơtă pơtăn, anai lĕ bruă mă yom pơphăn biă mă, anom bruă tơgŭ kơđi kiăng ngă djơ̆ jơlan hơdră mơ̆ng ping gah anăp bruă či ngă dăp glăi, pơphun bruă mă hơbôt-rơgơi-kơtang-tŭ yua-sit nik-hơmâo boh tơhnal; lir hơbit hăng pơblih phrâo amăng sang bruă hăng pơblih phrâo hơdră git gai; pơhlôm djop mơnuih ngă khua, apăn bruă, mơnuih mut mă bruă sit nik amăng kơnuk kơna, khom djop tơlơi thâo rơgơi, mă bruă kơjăp, tong ten djơ̆ găl mrô mă bruă, pơđĭ bruă djop djơ̆ rơ-ua, gêh găl hăng tơlơi hơmâo sit nik; pơtong rơđah boh yom phun pơpha gưl apăn bruă kơ khua mua, mơnuih ngă bruă git gai, mơnuih mă bruă apah sit nik, mơnuih mă bruă pơkă thun blan.